Ministri Pajaziti po merr pjesë në Konferencën e Asamblesë Parlamentare të NATO-s në Shën Stefan të Malit të Zi
Ministri i Punëve të Brendshme, Zenun Pajaziti po merr pjesë në konferencën e organizuar nga Asambleja Parlamentare e NATO-s me temën “Europa Juglindore drejt integrimeve euroatlantike”, që po zhvillohet në Shën Stefan të Republikës së Malit të Zi.
Në sesionin e sotëm të paradites u diskutua për Kosovën.
Ministri Pajaziti paraqiti arritjet gjatë muajve të fundit që nga shpallja e pavarësisë deri te hyrja në fuqi e Kushtetutës dhe vlerësoi se “institucionet e Republikës së Kosovës po demonstrojnë përkushtim për ndërtimin e vendit dhe të shoqërisë demokratike”.
Pajaziti shpalosi orientimin dhe gatishmërinë e institucioneve të Republikës së Kosovës për bashkëpunim rajonal dhe integrim në strukturat e Bashkimit Europian dhe në NATO.
Pajaziti ka zhvilluar takime të shumta me pjesëmarrës të konferencës nga vende te ndryshme të rajonit, vendet anëtare të Bashkimit Europian dhe të NATO-s, ku është diskutuar lidhur me nevojën e forcimit të bashkëpunimit rajonal, sidomos në fushën e sundimit të ligjit, si parakusht për anëtarësim në strukturat euroatlantike.
Autor / RTSH