Me ftesë të Ministrit të Mbrojtjes Boro Vuçiniç, ministri i Mbrojtjes Gazmend Oketa zhvilloi një vizitë dy ditore në Malin e Zi. Oketa nënshkroi edhe një marrëveshje me homologun e tij malazez e cila parashikon një bashkëpunim më të ngushtë në disa fusha të mbrojtjes.Të dy ministrat e Mbrojtjes zhvilluan fillimisht një takim kokë më kokë për rreth 15 minuta, ku biseduan për çështje të rëndësishme të mbrojtjes dhe të rajonit. Më pas, ministri Oketa vijoi me takimin bilateral së bashku me grupin që e shoqëronte.Fillimisht ministri i Mbrojtjes Vuçiniç shprehu kënaqësinë që homologu i tij shqiptar ndodhej në Malin e Zi dhe më pas i përcolli urimet për marrjen e ftesës nga ana e Shqipërisë për anëtarësimin në NATO.Gjithashtu Ministri Oketa i shprehu homologut Vuçiniç kënaqësinë e kësaj vizite të parë në vendin e tij.
„Niveli i marrëdhënieve tona, tha z.Oketa, është shumë i mirë dhe është detyra jonë si politikanë dhe qeveritarë të japim kontribut sa më të madh për t’i çuar më tej ato. Në Mal të Zi ka një komunitet shqiptar që gjithmonë është një faktor i rëndësishëm dhe ndikon për mirë në këto marrëdhënie dypalëshë dhe në miqësinë që ekziston mes dy vendeve. Më tej, shtoi z.Oketa, qeveria shqiptare ka shumë vite që investon ndjeshëm në politikën e jashtme dhe tashmë është kthyer në një faktor stabiliteti në rajon e më gjërë. Javën e ardhshme ne firmosim protokollin e anëtarësimit në Aleancë dhe do të uronim që një rrugë të tillë të ndjekin edhe Maqedonia e vende të tjera si i juaji.
Adriatik 3 rezultoi shumë i frytshëm dhe unik dhe si Ministër Shqiptar i Mbrojtjes mund të them se Shqipëria është e gatshme të bashkëpunojë me Malin e Zi dhe të vërë në dispozicion të gjithë nivelet e ekspertëve për t’ju ndihmuar e për një bashkëpunim të ngushtë në mbrojtje.
Anëtarësimi në NATO ka obligime, por vetëm duke punuar mund të arrijmë rezultate të mëdha, me një kosto sa më efiçente, shtoi Oketa „Ministri Gazmend Oketa, u ndal edhe në çështjen e Kosovës. Pavarësia e Kosovës,- tha ai, është dhe do të jetë në vazhdimësi një faktor stabiliteti në rajon. Jemi të bindur se i gjithë rajoni ynë duhet të kthejë sytë nga Bashkimi Europian dhe NATO, përfundoi Ministri.Ministri Oketa e uroi gjithashtu Ministrin Vuçiniç për pranimin e Malit të Zi në nismën e Partneritetit për Paqe (PfP) duke i shprehur mbështetjen e plotë të Shqipërisë për vendin e tij për anëtarësimin në çdo nismë integruese e rajonale.Ministri i Mbrojtjes i Malit të Zi Boro Vuçiniç tha se është me shumë rëndësi për stabilitetin në rajon ruajtja dhe çuarja më tej e marrëdhënieve të mira mes dy vendeve tona.
Hyrja juaj drejt NATO-s është një rrugë që do ta ndjekim edhe ne dhe ambicja jonë është që të finalizojmë diçka në Samitin e ardhshëm të Aleancës. Ju falenderoj, tha z.Vuçiniç, për përkrahjen që na jepni. Ushtritë tona edhe pse të vogla në numër duhet të kenë një bashkëpunim të fortë.
Ju falenderoj për marrëdhëniet e mira me Akademinë në Tiranë dhe besoj se kjo marrëveshje, që do të nënshkruajmë sot, do të krijojë një pasqyrë edhe më të qartë në të ardhmen të bashkëpunimit dhe marrëdhënieve tona.
Më pas të dy ministrat e Mbrojtjes nënshkruan në prani të mediave marrëveshjen e bashkëpunimit midis dy ministrive, e cila parashikon disa fusha ku do të nisë një plan bilateral bashkëpunimi midisa Forcave të Armatosura Shqiptare dhe atyre të Malit të Zi, si shkëmbim eksperience, takime për shkëmbim informacioni, vizita portuale të anijeve, studime e trajnime.
Autor :Shërbimi Informativ/mod.gov.al