Diaspora të marrë pjesë në projekte të përbashkëta në Ulqin

Kryetari i komunës së ulqinit, Gëzim Hajdinaga, priti të hënën kryetarin e KKSHA-së, Riçard Lukaj
Ulqin - Kryetari i Komunës së Ulqinit, Gëzim Hajdinaga dhe bashkëpunëtorët e tij pritën të hënën në një takim pune z. Riçard Lukaj, kryetar i Këshillit Kombëtar Shqiptaro-Amerikan.
Në kumtesën për opinion të lëshuar pas këtij takimi nga kabineti i kryetarit të Komunës së Ulqinit thuhet se në këtë takim u prekën një sërë çështjesh të rëndësishme, të inicuara në takimet e mëparshme ku edhe dispora mund të luajë rol të rëndësishëm.
Vëmendje e veçantë iu kushtua realizimit të idesë për ndërtimin e godinës së re të shkollës në Sukubinë, projekt ky që do të realizohet në bashkëpunimin tripalësh ndërmjet Komunës së Ulqinit, Ministrisë së Arsimit dhe Shkencës dhe diasporës sonë në SHBA.
Lidhur me këtë u la që sa më parë të hartohet projekti detaj, i bazuar në atë ideor, të përgatitet dokumentacioni i duhur dhe menjëherë të fillohet realizimi i tij.
Kryetari i Komunës së Ulqinit, Gëzim Hajdinaga, lidhur me këtë çështje paralajmëroi një takim me ministrin e Arsimit, ndërkohë që autorizoi Sekretariatin për Urbanizëm pranë Komunës së Ulqinit që të bëjë kompletimin e dokumentacionit përkatës.
Hajdinaga dhe Lukaj edhe në këtë takim shprehën gatishmërinë e tyre për jetësimin e projekteve të përbashkëta, respektivisht praninë më të madhe të diasporës tonë në to.
Burimi / Kohapress