KF”Otrant” shënoi fitoren e parë në ligën e dytë të Malit të Zi në futboll
Tri pikët e para
“Otrant”-i ka fituar në fushën e vet ndaj “Mladost”-it nga Podgorica me rezultatin 2:1. Të dy golat për “Otrant”-in i ka shënuar futbollisti nga Kosova Fetim Kasapi, lojtari më i mirë i ndeshjes, ndërsa golin e vetëm për “Mladost”-in e ka shënuar Darko Nikaç.
Ulqin – Klubi i Futbollit “Otrant” nga Ulqini ka fituar tri pikët e para në kampionatin e sivjetshëm të Ligës së Dytë të Malit të Zi pasi që të dielën ka fituar në fushën e vet me rezultatin 2:1 ndaj KF “Mladost” nga Podgorica.
Të dy golat për “Otrant”-in i ka shënuar futbollisti nga Kosova Fetim Kasapi, lojtari më i mirë i ndeshjes. Golin e parë Kasapi e ka shënuar me një gjuajtje të lirë nga një distancë prej rreth 25 metrash, në minutën e parë të pjesës së dytë, kurse golin e dytë me penallti, në minutën e 54-të të ndeshjes, pasi që njëri nga lojtarët kundërshtarë në murin mbrojtës e ka prekur më parë topin me dorë pas goditjes së gjuajtjes së lirë po nga Kasapi.
Golin e vetëm për “Mladost”-in e ka shënuar Darko Nikaç nga zona e lirë, në minutën e 84-të, pas gabimit të portierit vendas dhe mbrojtjes, të cilët nuk kanë ndërhyrë siç duhet pas një krosimi në zonë.
“Otrant”-i ka luajtur më mirë gjatë gjithë ndeshjes dhe ka krijuar shumë raste për shënim, por ato nuk janë realizuar nga Truma, Vokshi, Kasapi dhe Popoviq.
Të dy ekipet e kanë përfunduar ndeshjen me nga dhjetë lojtarë. Arbitri kryesor i ndeshjes, Savo Vujoviq nga Cetina, së pari ka nxjerrë jashtë loje në minutën e 51-të portierin e “Mladost”-it, Milan Paviqeviq, pas një ndërhyrje të parregullt jashtë zone ndaj lojtarit vendas Adi Alloviq. Më pas, në minutën e 63-të të ndeshjes, ka qenë vetë Adi Alloviq që e ka lënë ndeshjen pas kartonit të dytë të verdhë.
Pas dy javëve të Ligës së Dytë të Malit të Zi në futboll, “Otrant”-i ka arritur një fitore dhe një humbje (në javën e parë ndaj “Çelik”-ut nga Nikshiqi me rezultatin 2:0). Në ndeshjen e ardhshme të javës së tretë, “Otrant”-i do të jetë mysafir i “Bratstvo”-s.
I.Kallaba
Koha Javore