Jep dorëheqje menaxheri i klubit të basketbollit “Ulqini”, Pavle Pepgjonoviq

Dorëheqje me zemër të thyer
Ulqin - Menaxheri i Klubit të Basketbollit “Ulqini”, Pavle Pepgjonoviq, ka dhënë të martën zyrtarisht dorëheqjen.
Ai e ka bërë këtë të njohur në një konferencë për shtyp.
“Nuk kam më fuqi të luftoj. Ndjehem vërtet shumë keq. Nuk mund ta përshkruaj se si ndjehem dy ditët e fundit pas marrjes së vendimit për t`u tërhequr”, ka thënë Pepgjonoviq.
Ai ka thënë se e don “Ulqin”-in pasi që është klubi i tij, por që nuk ka mundur që të luftojë më i vetëm.
“KK “Ulqini” nuk jam vetëm unë. Këtë e kam thënë shpesh. Nuk dua të flas shumë sepse veprat flasin vetë. Kam punuar në mënyrë vullnetare dhe të ndershme në interes të zhvillimit të sportit në Ulqin”, ka thënë Pepgjonoviq.
Ai ka përkujtuar se klubi është trajtuar si shkollë e sportit e jo si klubi i parë nga ky qytet që ka arritur të bëjë gara në Ligën e Parë, qoftë në rastin e termineve për stërvitje, por edhe me rastin e ndarjes së mjeteve për sport nga buxheti i Komunës së Ulqinit.
KK “Ulqini” ka arritur të kualifikohet në Ligën e Parë, kurse vitin e parë të debutimit në Ligën e Parë në Kupën Final Four. Vitin e kaluar ai ka qenë organizator i Kupës “Final Four”, të parës pas fitimit të pavarësisë nga Mali i Zi.
Pepgjonoviq ka thënë se ka ardhur koha që të pushojë dhe t`u kthehet obligimeve private dhe jetësore.
Megjithatë ai është shprehur i gatshëm të ndihmojë në çdo rast.
“Klubi i Basketbollit është pjesë e imja dhe gjithmonë kur të ekzistojnë kushtet do të ndihmoj në kufijt e mundësive të mia”, ka thënë Pepgjonoviq.
Ai ka falënderuar të gjithë ata që kanë kontribuar në ngritjen e KK “Ulqini”, por edhe prindërit e tij për mbështetjen dhe mirëkuptimin.
Pepgjonoviq njihet si punëtor sportiv dhe personi me kontributet më të mëdha për sukseset e KK “Ulqini” gjatë viteve të fundit. Për këtë ai edhe ka marrë çmimin si menaxheri më i mirë sportiv në Ulqin.
i.k.
Koha Javore