Të premten në Durrës u bë përurimi i librit të Prim.Dr.Gani Karamanaga”mjekimi me faktorë natyrorë në regjionin e Ulqinit”
Përurim dinjitoz
– Dr. Lida Boshku, drejtoreshë e Drejtorisë së Shëndetit Publik të Qarkut të Durrësit e vlerësoi shumë lart librin duke thënë se ky mund të jetë një shembull i mirë se si mund të promovohen vlerat turistike, shëruese dhe kulturo-historike të një vendi të përmbledhura në një punim të tillë shkencor.
– Autori i librit, prim. dr. Gani Karamanaga, u bëri thirrje kolegëve nga Shqipëria për një bashkëpunim më të madh në çdo fushë të veprimit si shëndetësor ashtu edhe kulturor.
Të premten në sallën e Pallatit të Kulturës “Aleksandër Mojsiu” në Durrës u bë përurimi i librit “Mjekimi me faktorë natyrorë në regjionin e Ulqinit” i autorit prim. dr. Gani Karamanaga.
Në sallën përplot me të interesuar, të gjithë mjekë të profileve të ndryshme, seancën e udhëhoqi Dr. Lida Boshku, drejtoreshë e Drejtorisë së Shëndetit Publik të Qarkut të Durrësit e cila pasi përshëndeti të pranishmit librin të cilin e promovonin e vlerësoi shumë lart duke thënë se ky mund të jetë një shembull i mirë se si mund të promovohen vlerat turistike, shëruese dhe kulturo-historike të një vendi të përmbledhura në një punim të tillë shkencor.
Shkrimtari ynë i njohur Hajro Ulqinaku përkujtoi të pranishmit për lidhjet që ekzistojnë mes dy qyteteve, Ulqinit dhe Durrësit, si shpirtërore ashtu edhe familjare, dhe tha se nuk është rastësi që mu në Durrës të bëhet përurimi i këtij libri. Mbresë të madhe te të pranishmit la edhe thënia të cilën Hajro Ulqinaku citoi e ajo është se “mjeku ndihmon e natyra shëron” dhe se ky libër mu këto mesazhe sjell.
Sipas radhës të pranishmëve për librin fjalë miradije thanë edhe Prof. Dr. Elez Selimi, shef i Departamentit të Pneumologjisë pranë Spitalit Universitar për sëmundjet e mushkërive të Fakultetit të Mjekësisë në Tiranë, Prof. Dr. Hektor Çoçoli nga Spitali Universitar për sëmundjet e mushkërive dhe Fakulteti i mjekësisë Tiranë, Dr. Gjergji Minga, shef i sektorit të laboratorit universitar, Fakulteti i mjekësisë Tiranë.
Në fund të pranishmit i përshëndeti autori i librit, prim. dr. Gani Karamanaga, i cili i ftoi kolegët nga Shqipëria për një bashkëpunim më të madh në çdo fushë të veprimit si shëndetësor ashtu edhe kulturor.
Në mesin e të pranishmëve ishte edhe Dr. Flamur Topi të cilin e njohim përmes emisionit “Trupi dhe shëndeti” në Televizionin Shqiptar, i cili edhe e ftoi autorin e librit që të jetë mysafir në njërin prej emisioneve të cilin do ta realizojë lidhur me këtë temë.
Pas ceremonisë zyrtare pasoi një koktej në një ambient shumë mbresëlënës pranë plazhit të Durrësit.
Gazmend Çitaku
Koha Javore