Mali i Zi do ta paraqesë qëndrimin zyrtar në OKB në New York
Mali i Zi do ta paraqesë qëndrimin zyrtar rreth njohjes së pavarësisë së Kosovës në Asamblenë e Përgjithshme të Kombeve të Bashkuara në New York, ka deklaruar të enjten,Kryeministri malazez Milo Djukanovic.Ai ka thënë se në emër të Malit të Zi, këtë qëndrim do ta paraqesë Presidenti malazez, Filip Vujanovic.“Vujanovic do ta paraqesë në Asamblenë e Përgjithshme qëndrimin tonë zyrtar. Ka mbetur mjaft kohë që Vujanovic të konsultohet me aktorët më të rëndësishëm politik në Mal të Zi, në mënyrë që edhe ndaj kësaj çështje të mund të përcaktohemi në mënyrë relevante”,citohet të këtë thënë Djukanovic,nga mediat malazeze.
Debati i përgjithshëm në Asamblenë e OKB’së, përkatësisht java presidenciale, fillon të martën,gjatë të cilës do të mbajnë fjalime krerët më të lartë të shteteve anëtare të OKB’së. Tash për tash nuk dihet se në cilën nga ditët e javës së ardhshme do të flasë Presidenti Vujanovic. Ditëve të fundit media ndërkombëtare dhe vendore kanë cituar burime qeveritare në Podgoricë dhe Shkup, se Mali i Zi dhe Maqedonia do të njohin së shpejti pavarësinë e Kosovës.Derisa dy fqinjët e Kosovës kanë dhënë sinjale për njohje, Serbia po lobon në Asamblenë e Përgjithshme që të përkrahet kërkesa e saj për deklarimin e Gjykatës ndërkombëtare të Drejtësisë rreth ligjshmërisë së pavarësisë së Kosovës.Asambleja do të vendosë sot përfundimisht nëse kërkesa serbe do të hyjë në rend dite.
Burimi / Gazeta Express