Ndihmësministrja e Punëve të Jashtme e Malit të Zi,Irena Radoviq, priti të martën ambasadorin e Republikës së Shqipërisë në Mal të Zi,Tonin Beci
Ngritja e marrëdhënieve diplomatike hap perspektiva të reja
Podgoricë – Ndihmësministrja e Punëve të Jashtme e Malit të Zi për marrëdhënie dypalëshe, Irena Radoviq, priti të martën ambasadorin e Republikës së Shqipërisë në Mal të Zi, Tonin Beci.
Ndihmësministrja Radoviq e vlerësoi të suksesshëm bashkëpunimin dypalësh dhe theksoi se ngritja e marrëdhënieve në nivel ambasadorësh hap perspektiva të reja për forcimin e mëtejshëm të marrëdhënieve të gjithanshme të Malit të Zi dhe Republikës së Shqipërisë, thuhet në deklaratën për shtyp të MPJ-së së Malit të Zi.
Radoviq theksoi rëndësinë e vizitave të Presidentit të Shqipërisë Bamir Topi në Mal të Zi dhe kryeministrit të Malit të Zi Millo Gjukanoviq në Shqipëri, të cilat pritet të realizohen deri në fund të vitit.
Nga ana tjetër, ambasadori Beci përsëriti përkushtimin e Shqipërisë ndaj forcimit të lidhjeve me Malin e Zi në planin dypalësh, rajonal dhe multilateral. Beci ka përcjellur interesimin e palës shqiptare për bashkëpunim në të gjitha nivelet, prandaj në këtë kontekst ka shprehur kënaqësi për avancimin e vazhdueshëm të bashkëpunimit të dikastereve të drejtësisë, punëve të brendshme dhe mbrojtjes. Posaçërisht është potencuar rëndësia e nënshkrimit të ardhshëm të Marrëveshjes së Bashkëpunimit në fushën e arsimit, shkencës dhe bashkëpunimit teknologjik ndërmjet Malit të Zi dhe Shqipërisë, gjë që do të ofrojë bazë institucionale për forcimin e bashkëpunimit në këto fusha.
Në deklaratën për shtyp thuhet se të dy palët kanë konstatuar se me bashkëpunimin e mirë ndërfqinjësor Mali i Zi dhe Shqipëria i kontribuojnë në mënyrë cilësore stabilitetit dhe forcimit të perspektivës së përbashkët europiane dhe euro-atlantike.
Koha Javore