Kryetari i Unionit Demokratik të Shqiptarëve, Ferhat Dinosha, ka deklaruar të mërkurën se, partitë politike shqiptare që kanë bashkëpunuar me një pjesë të opozitës, që ka edhe parti proserbe kanë gabuar. Lideri i UDSH këtë e ka vlerësuar këtë si mungesë të eksperiencës politike. Dy parti nacionale shqiptare Alternativa Shqiptare dhe Forca e Re Demokratike, në zgjedhjet presidenciale të 6 majit, kanë përkrahur kandidatin e Lëvizjes për Ndryshime, Nebojsha Medojeviq, i cili ka kundërshtuar vendimin e Qeverisë së Malit të Zi për ta njohur pavarësinë e Kosovës. Lideri i Unionit Demokratik të Shqiptarëve, ka deklaruar se nuk vjen në shprehje bashkëpunimi me partitë që përfaqësuesit e ligjshëm të Kosovës i quan terroristë. Dinosha, ka shtuar se nëse mendojmë të avancojmë pozitën e shqiptarëve në Malin e Zi duhet shikuar thellimi i bashkëpunimit me forcat politike që udhëheqin këtë vend, ato që kanë rikthyer pavarësinë e Malit të Zi. Ndërkaq, lideri i Alternativës Shqiptare, Vasel Sinishtaj, si përgjigje ndaj deklaratës së liderit të UDSH-së u shpreh se, “atë çfarë kam dëgjuar në protestën e mbajtur në Podgoricë kundër vendimit të qeverisë malazeze për njohjen e pavarësisë e Republikës së Kosovës, e kam konsideruar si të kaluar” dhe se, “në të ardhmen do të llogaris mirë së kënd do të votoj”. Sinishtaj ka shtuar se sa i përket avancimit të shqiptarëve në Mal të Zi, “shqiptarët duhet të bashkëpunojnë ndërmjet veti, e jo në këtë mënyrë disa në njërën anë, e të tjerët të komentojnë atë se çfarë është mirë për shqiptaret”.
Autor / Gëzim Ibroçi
Burimi / Telegrafi

http://www.dailymotion.com/video/x74esy