Pejë, 8 maj – Mësim të mirë se si promovohet dhe zhvillohet turizmi i qytetit, krerët komunalë të Pejës kanë mundur të marrin, të premten, nga kreu i Ulqinit, Gëzim Hajdinaga, i cili edhe sivjet para fillimit të sezonit veror turistik, të premten në Pejë ka nisur rrugëtimin e tij promovues nëpër Kosovë, “Ulqini 2009”. “Që dy-tri vjet rresht po vij në Pejë, e ju asnjëherë nuk erdhët në Ulqin me promovua turizmin malor dhe të joshni atje qytetarët tonë, të cilët shkojnë të relaksohen në bjeshkët e Jahorinës dhe Zhablakut, kur mund të vinë në këto bjeshkë të bukura të Pejës”, iu ka propozuar Hajdinaga krerëve komunal të Pejës, një memorandum bashkëpunimin në fushën e turizmit. Kryetari i Pejës Ali Berisha, ka pranuar këtë ofertë për jetësimin e këtij bashkëpunimi turistik, duke përmendur me këtë rast edhe nevojën e rindërtimit dhe lëshimin në qarkullim të rrugës që lidh Pejën me Malin e Zi, përmes Çakorrit. Zhvillimi i turizmit, para së gjithash turizmi malor ka dominuar gjithnjë në të gjitha planet zhvillimore të qytetit të Pejës, të hartuara në periudhën e pasluftës. Por, promovimi i kësaj dege të rëndësishme për zhvillimin ekonomik të Pejës ka mbetur vetëm në letër dhe në deklarata të pushtetarëve para opinionit pejan, por jo edhe jashtë vendit, sikur që e bëjnë të tjerët. Në këtë takim të krerëve të komunave, ai i Pejës vuri theksin në bisedën për vijën e demarkacionit mes Kosovës dhe Malit të Zi.
Gazeta Express