Takewondo“Ulqini” Arijeta Zati kampione e dyfishtë
U mbajt kampionati i Malit të Zi në taekwondo për kadetë dhe seniorë
Kampionë të Malit të Zi u shpallën edhe Adnan Hoxha, Rinor Jahja, Ardijana Karamanaga, Adelisa Muslijeviq dhe Adnan Hasa, i cili fitoi dy medalje të arta dhe një të bronztë.
Klubi i Takewondo-së “Ulqini” fitoi 32 medalje në Kampionatin e Malit të Zi për kadetë dhe seniorë që u mbajt më 26 prill. “Ulqini” fitoi shtatë medalje të arta, 12 medalje të argjendta dhe 13 medalje të bronzta.
Rezultatin më të mirë e arriti Arijeta Zati, e cila arriti të shpallej kampione e Malit të Zi edhe për seniore, duke qenë kështu kampione e dyfishtë e vendit, në dy kategori – për juniore dhe seniore. Vetëm pak kohë më parë ajo është shpallur kampione e Malit të Zi edhe në kategorinë e junioreve.
Kampionë të Malit të Zi u shpallën edhe Adnan Hoxha, Rinor Jahja, Ardijana Karamanaga, Adelisa Muslijeviq dhe Adnan Hasa, i cili fitoi dy medalje të arta dhe një të bronztë.
Nënkampionë të Malit të Zi në kategorinë e kadetëve u shpallën Mersodin Kurti, i cili fitoi dy medalje të argjendta dhe një medalje të bronztë, Esad Kraja, Edina Kraja, Emina Kanaqi, Izedin Kurti dhe Nail Karamanaga, kurse në kategorinë e seniorëve Adrijan Zenuni i cili fitoi dy medalje të argjendta dhe një të bronztë, Allmedin Suka dy medalje të argjendta, Besnik Shata një medalje të argjendtë dhe një të bronztë, si dhe Artan Fici dhe Medina Kanaqi nga një medalje të argjendtë.
Me medalje të bronzta u kurorëzuan Ali Hasa (fitoi dy medalje të bronzta), Arben Kollari, Artan Zenuni, Leonard Dobreci, Shukri Bakalli, Nuri Kanaqi, Bojan Vladisavleviq dhe Sulejman Murati.
Kryetrajneri i KT “Ulqini”, Fikret Dushku, shpjegon se për shkaqe financiare kanë qenë të detyruar të marrin pjesë në Kampionat me 25 garuesit më me perspektivë të këtij klubi.
Ai e vlerëson rezultatin e arritur nga garuesit e tij si suksesin e radhës.
Por pëveç vështirësive financiare, sipas Dushkut, garuesit e KT “Ulqini” janë përballur në këtë kampionat edhe me njëanshmëri sa i përket referimit në dëm të tyre.
“Për të dytin vit me radhë gjyqtarët na shkaktuan disa humbje në dëm të garuesve tanë dhe klubin tonë”, thotë ai.
Në kuadër të KT “Ulqini” stërvisin katër garues të cilët që katër vjet mbrojnë ngjyrat e Përfaqësueses së Malit të Zi në gara të ndryshme me karakter ndërkombëtar, siç është Kampionati Evropian i Regjionit Jugor dhe Kampionati Ballkanik. Në këto gara ata arritën të fitojnë dy medalje të argjendta dhe një medalje të bronztë duke mbrojtur me dinjitet ngjyrat e Përfaqësueses së Malit të Zi.
Kryetrajneri i KT “Ulqini” thotë se edhe këtë vit do të përpiqen të marrin pjesë në kampionate me karakter ndërkombëtar.
Ai njofton se në fundjavë garuesit e këtij klubi do të marrin pjesë në Sarajevë, në Turneun Ndërkombëtar “Olympic Open”, një turne i nivelit evropian, ku marrin pjesë garues nga të paktën 25-30 vende.
Kohapress