Oferta turistike e Ulqinit prezantohet në Tetovë
Një delegacion nga komuna e Ulqinit, të martën, ka prezantuar në komunën e Tetovës ofertën turistike për sezonin veror 2009. Në kohën e krizës globale, qyteti i Ulqinit për këtë vit do të ofrojë një ofertë të begatshme me çmime të kapshme për xhepat e qytetarëve.
Sivjet, çmimet e ofertës turistike afërsisht për 30 përqind do të ulen.
Kryetari i komunës së Tetovës, Sadi Bexheti dhe kryetari komunës së Ulqinit Gëzim Hajdinaga gjatë takimit janë fokusuar në bashkëpunimin në sferën e turizmit dhe në të njëjtën kohë kanë diskutuar edhe mbi procesin e decentralizimit, si një mundësi për të fuqizuar kompetencat e komunave. Çështja e organizimit të komunave ka qenë temë tjetër që është diskutuar në këtë takim. Të dy kryetarët kanë rënë dakord që bashkëpunimi të intensifikohet në të gjitha sferat.
“Bashkëpunimi do të vazhdojë në të gjitha sferat, duke u fokusuar në atë që është më e rëndësishme, ofertat turistike për sezonin veror, por njëkohësisht diskutuam edhe problemin e organizimit të komunës së Ulqinit dhe sektorët të cilët i kanë të zhvilluar, mënyrën e bashkëpunimit me pushtetin qendror, decentralizimin dhe kompetencat e pushtetit lokal. I ftojmë të gjithë qytetarët e komunës së Tetovës dhe Pollogut që për këtë vit sezonal të përcaktohen për Ulqinin, sepse do të ketë një ulje çmimesh për turistët pasi që këtë vit parashihet krizë. Ofertat do të jenë të volitshme”, tha pas takimit kryetari i komunës së Tetovës Sadi Bexheti.
Kryetarin e Komunës së Ulqinit, Gëzim Hajdinaga, tha se ky bashkëpunim është pjesë e idesë që komuna të jetë servisë i qytetarëve.
“Ramë dakord që edhe në të ardhmen të vazhdojë me hapa të përshpejtuar procesi i plotë i decentralizimit të pushtetit lokal. Më vjen mirë që kryetari juaj ka njohuri për komunën tonë sidomos për tre lokalitetet më të mëdha, plazhi i madh, ishulli Ada dhe pjesa e ullishtës. Numri më i madh i qytetarëve të komunës së Tetovës, i njohim këto vende dhe kanë qenë pjesë në të kaluarën dhe pritet të jenë edhe këtë vit”, tha kryetari i komunës së Ulqinit, Gëzim Hajdinaga. Gjithsesi, tha ai, rëndësi i kushtohet Shkupit, Tetovës, Gostivarit dhe qyteteve të Kosovës. “Kam ardhur për t’ju falënderuar, pasi që qytetarët e Tetovës dhe shqiptarët në përgjithësi janë turist të rregullt në Ulqin”, tha Hajdinaga.
Sipas kryetarit të komunës së Ulqinit, gjatë muajve paraprak është bërë rregullimi i rrjetit të ujit, rrymës elektrike, ndërsa në dispozicion janë 13 kilometra plazh, kurse gjatë sezonit ky qytet është nikoqir i më shumë se 120 mijë turistëve.
Gjatë këtij takimi është diskutuar që edhe oferta e qytetit të Tetovës të prezantohet në këtë qytet sidomos gjatë sezonit dimëror. Nga ana e kryetarit të komunës së Ulqinit janë ftuar trupa e teatrit, së cilës i është rezervuar një natë për një shfaqje gjatë sezonit veror kur edhe në këtë qytet zhvillohen aktivitete kulturore.
