Presidenti Topi takon Kryeministrin e Malit të Zi, Milo Gjukanoviç
Në ditën e dytë të vizitës së tij zyrtare në Malin e Zi, Presidenti i Republikës, Prof. Dr. Bamir Topi dhe delegacioni që e shoqëron, u prit nga Kryeministri i Malit të Zi, Milo Gjukanoviç.
Bashkëbiseduesit në takim vlerësuan nivelin shumë të mirë të marrëdhënieve midis Shqipërisë dhe Malit të Zi dhe shprehën dëshirën dhe angazhimin e plotë për intensifikimin e mëtejshëm të tyre, bazuar në parime e standarde të fqinjësisë së mirë e të integrimit evropian, si dhe për të çuar në nivel akoma edhe më të lartë marrëdhëniet e bashkëpunimit në të gjitha fushat me interes të ndërsjellë. Në këtë kontekst, Presidenti Topi vuri në dukje se dhe kjo vizitë zyrtare është një tregues i rëndësishëm i vullnetit të mirë politik nga të dyja palët për të mundësuar krijimin e hapësirave më të gjera për bashkëpunimin e zhvillimin e shpejtë të dy vendeve tona në interesin e përbashkët të stabilitetit, zhvillimit dhe integrimit evropian.
Pasi bëri një panoramë të zhvillimeve të fundit në Shqipëri, Presidenti Topi vuri në dukje se vendi ynë tashmë po ecën me hapa të shpejtë e të sigurtë në përmbushjen e plotë të standardeve integruese në familjen e madhe evropiane, duke vënë theksin në ecurinë pozitive të reformave të rëndësishme në vend si dhe në mbajtjen e suksesshme të zgjedhjeve të fundit parlamentare, konstituimin e parlamentit dhe krijimit tw qeverisw sw re.
Kryetari i Shtetit vuri edhe një herë në dukje se vendi ynë shikon të një përparësie prioritare zhvillimin e marrëdhënieve të fqinjësisë së mirë me vendet e rajonit dhe në këtë prizëm theksoi se marrëdhëniet e mira politike shërbejnë si faktorë nxitës të thellimit të bashkëpunimit ekonomik dhe atij tregëtar, ku përparësi do të merrte krijimi i një sistemi energjitik rajonal, fuqizimi i sistemit të komunikacionit dhe telekomunikacionit, lehtësimi i qarkullimit të mallrave dhe lehtësimi i qarkullimit të njerëzve. Në këtë kuadër, Presidenti Topi nënvizoi se nënshkrimi i disa marrëveshjeve të rëndësishme mes Shqipërisë dhe Malit të Zi si dhe mundësimi i lëvizjes së lirë të njerëzve sipas standardeve të BE-së, mendojmë se do t’i shërbejnë pozitivisht rritjes dhe forcimit të bashkëpunimit, veçanërisht në drejtim të zhvillimit ekonomik dhe rritjes së shkëmbimeve tregtare mes dy vendeve tona.
Në vijim të bisedës u trajtuan dhe çështje të bashkëpunimit në fusha të tjera të rëndësishme si ajo e turizmit, infrastrukturës, mbrojtjes, bashkëpunimit në fushën e rendit dhe sigurisë, luftën kundër krimit të organizuar, kontrollin e kufijve, mjedisit, arsimit dhe kulturës. Duke u ndalur në këto momente, Presidenti Topi vuri në dukje se shqiptarët në Malin e Zi dhe komunitetin malazez në Shqipëri i konsiderojmë si urë lidhëse dhe miqësi edhe një faktor pozitiv në marrëdhëniet midis dy vendeve.
Nga ana e tij, Kryeministri malazez, Gjukanoviç, vlerësoi lart zhvillimet dhe arritjet e Shqipërisë në rrugën e saj integrimit euroatlantik dhe rolin Presidentit Topi në këtë drejtim. Z. Gjukanoviç vlerësoi gjithashtu edhe rolin e rëndësishëm moderator të Shqipërisë dhe faktorit shqiptar rajon në favor të një qëndrueshmërie afatgjatë dhe zhvillimi e bashkëpunimi ekonomik më të gjerë.
Kryeministri Gjukanoviç, pasi bëri një panoramë të hollëishme të reformave dhe situatës politike dhe ekonomike në Malin e Zi, theksoi rëndwsinë e futjes së të gjitha vendeve të rajonit në strukturat euro-atlantike, sepse kjo do të rriste maksimalisht shkallën e sigurisë dhe qëndrueshmërisë në Ballkan dhe do të përmbushte apiratat integruese të popujve tanë duke tërhequr edhe më shumë investime të huaja.
Të dy persnalitetet e larta shtetërore ndanë pikëpamje të përbashkëta përsa u përket kapërcimit të efekteve të krizës ekonomike globale, rritjes së bashkëpunimit ekonomik duke patur përparësi projekte të përbashkëta në infrastrukturë, mjedis me ekosistemet e përbashkëta dhe sidomos në fushën energjitike duke shfrytëzuar burimet natyrore dhe potencialet e mëdha të dy vendeve tona.
Nga Kabineti i Presidentit të Republikës, Prof. Dr. Bamir Topi
http://video1.top-channel.tv/18754796/flv/kronika/topi-maliizi.flv