Eurosporti, mikpritës i Basketball team Ulqini – Video
Eurosporti, mikpritës i tri skuadrave
Aktiviteti i parë më serioz në basketbollin kosovar për vitin 2010 pa dyshim do të jetë ai i kadetëve të Kolegjit Eurosport. Prej 22-24 janar, të rinjtë prishtinas do të kenë rast shumë të mirë të vlerësojnë nivelin e tyre dhe njëkohësisht të fitojnë një përvojë tepër të rëndësishme. Gjatë atyre tri ditëve, mysafirë të tyre do të jenë moshatarët nga dy klube turke dhe një nga Mali i Zi. “Kemi arritur marrëveshjen dhe tashmë e kanë konfirmuar ardhjen kadetët e skuadrave turke Yucetepe Spor e Ankarasë, Burs Kolegj e Stambollit dhe Ulqini nga Mali i Zi”, ka njoftuar trajneri i Eurosportit, Ibrahim Karabeg. Sipas tij, ky do të jetë një rast i mirë që të rinjtë e kësaj skuadre të fitojnë një përvojë të rëndësishme për të ardhmen e tyre. “Zhvillimi i ndeshjeve miqësore me skuadra të ndryshme është shumë e mirëseardhur, sepse vetëm në këtë mënyrë ata e shohin realisht nivelin e tyre dhe fitojnë përvojë që do t’u ndihmojë shumë për të ardhmen”, ka shtuar Karabeg. Mirëpo, ai vlerëson se ky aktivitet duhet të jetë shembull edhe për klubet e tjera dhe vetë Federatën e Basketbollit të Kosovës. “Aktivitetet me grup-moshat e reja janë mënyra më e mirë për të përparuar basketbolli i Kosovës dhe njëherësh do të shërbente në përpjekjet tona për ndërkombëtarizim. Prandaj mendoj se një politikë të tillë duhet ta ndjekin edhe klubet e tjera”, ka deklaruar trajneri i skuadrës prishtinase. Ndërkohë, ai parashikon se turneu me skuadrat mysafire do të jetë i organizuar në mënyrën më të mirë. “Shpresoj se do të jetë një turne i përgatitur mirë. Kemi bërë ftesa për zyrtarë të ndryshëm nga jeta politike, duke përfshirë edhe kryetarin e komunës si dhe ambasadën turke në Prishtinë. Pastaj, aty do të jenë edhe ish-basketbollistë kosovarë që nga gjeneratat më të vjetra e deri te më të rinjtë”. Karabeg ka besim se për organizim sa më të mirë nuk do të mungojë as përkrahja institucionale. “Ne e falënderojmë FBK-në dhe DSK-në, por edhe pronarin e Kolegjit Eurosport, Mustafë Havollin. Jam shumë optimist se ky aktivitet do t’i arsyetojë shpenzimet, kohën dhe punët që janë bërë rreth tij”, ka përfunduar Karabeg.