Ulqin, 6 korrik -  Shoqata e artistëve dhe intelektualëve “Art Club”, të hënën në mbrëmje në Ulqin, përuroi monografinë “Cafo Beg Ulqini dhe veprimtaria e tij politike” të autorit Fahri Buçinca, njofton KosovaLive. Është dashur të kalojnë gjashtë dekada për ta “kthyer të skalitur në një monografi” në vendlindjen e tij, në Ulqin, Cafo Begun, njërin prej personaliteteve më të shquara, jo vetëm të Ulqinit, por edhe të rrafshit kombëtar.
Redaktori i këtij botimi, Nail Draga, tha se publikimi i kësaj monografie ndriçon një periudhë shumë të rëndësishme të Ulqinit në shekullin e kaluar, ku për herë të parë shfaqen të dhënat mbi veprimtarinë politike dhe patriotike të Cafo Beg Ulqinit, kryetarit të Bashkisë së këtij qytetit në vitet 1941-45, deputet i Ulqinit në Parlamentin shqiptar.
“Në kohën e monizmit, Cafi ndiqej nga dy shtetet ish-komuniste, Jugosllavia dhe Shqipëria, i akuzuar si bashkëpunëtor i fashizmit dhe luftëtar për bashkimin e trojeve etnike shqiptare. I përbuzur nga sistemi i kohës, në vitin 1972 vdes në Shqipëri, por ditën e varrimit e ka nderuar gjithë Shkodra”, tha Draga.
Recensenti i librit, Mentor Quku nga Shkodra, apostrofoi luftën e denjë patriotike të Cafo Begut, i cili në vitin 1942 Ulqinin e bëri pjesë të Mbretërisë shqiptare. Ai ka qenë burrë i fjalës dhe i veprave, humanist dhe burrështetas, vlerësoi Quku.
Ndërsa historiani i moshuar ulqinak, Riza Rexha, tha se nëpërmjet këtij libri, lexuesi shqiptar në përgjithësi, por ai i Ulqinit në veçanti, mëson për torturat, vrasjet, ndjekjet e familjeve shqiptare të Ulqinit, Anës së Malit dhe Krajës, me akuzat se kanë bashkëpunuar me personalitetin më të ndritur të të gjitha kohërave të Ulqinit, Cafo Begun,”tradhtarin e popullit”, siç e përbaltnin komunistët.
Autori i monografisë, Fahri Buçinca nga Vushtria, dhëndër i trungut të familjes Alibegu të Ulqinit, tha se tash 60 vjet ka grumbulluar të dhëna për të ndriçuar sadopak jetën dhe veprën e këtij luftëtari të bashkimit kombëtar. Ai nuk mohoi faktin se biografi e këtij personaliteti të shquar historik të Ulqinit, është e gjerë, duke shtuar se ai është munduar ta ndriçojë vetëm një pjesë të saj.
“Me këtë libër nuk lahet borxhi për Cafo Beg Ulqinin”, u shpreh Buçinca para një auditoriumi të përzgjedhur nga Ulqini, Shqipëria, Kosova dhe diaspora.
Cafo Beg Ulqini, në vitin 1977 në moshën 85 – vjeçare vdiq i vetmuar në Shkodër, pa e parë Ulqinin as familjen e tij.

KOHA NET

• Nail Draga: Shqiptarët dhe zgjedhjet lokale
• Në Shas ka gjurmë të një kulture parahistorike të shekullit të gjashtë
• Pabarazia gjuhësore e shqiptarëve në Mal të Zi
• Letër e hapur , Kryetarëve të pesë subjekteve politike shqiptare në Komunën e Ulqinit
• Ana Malit trevë me personalitete të shquara