Podgorica hesht rreth kalimit kufitar me letërnjoftim
Podgoricë, 4 prill – Janë bërë dy vjet e më shumë qysh se subjektet politike shqiptare autoriteteve malazeze dhe atyre shqiptare u kanë kërkuar kalimin kufitar vetëm me letërrnjoftim, por edhe sot e kësaj dite kjo ka mbetur e parealizuar.
Kohë më parë, nënkryetari dhe deputeti i Forcës së Re Demokratike, Genci Nimanbegu, kishte deklaruar për KosovaLive se kjo parti parlamentare me këmbëngulje kërkon realizimin e iniciativës që qytetarët e zonave kufitare etnike shqiptare në Komunën e Ulqinit, Tivarit, Tuzi dhe Plavës, pikat kufitare t’i kalojnë me letërnjoftim.
“Kjo kërkesë e jona përsëritet tash disa vite dhe vazhdimisht është premtuar jetësimi i saj nga të dy qeveritë, Podgoricës dhe Tiranës, por shqiptarët e këtyre zonave vendkalimet kufitare duhet t’i kalojnë ende me pasaportë. Kroatët nga Boka e Kotorrit këtë mundësi për të hyrë në shtetin e tyre amë, Kroaci në pikën kufitare Debeli Brijeg e gëzojnë tash dy vjet”, shprehet Nimanbegu.
KosovaLive nga burimet e saj jozyrtare të Ambasadës shqiptare në Podgoricë, meson se Tirana tash dy javë i ka dorëzuar kërkesën Podgorices që shtetasit e të dy vendeve fqinje, jo vetem ata te zonave kufitare, pikat kufitare t i kalojnë me karta biometrike të identitetit.
Gjithnjë sipas këtyre burimeve, Podgorica zyrtare ende nuk i është përgjigjur Tiranës.
Shqiptarët e zonave kufitare të Ulqinit, Tivarit, Malësisë dhe Plavës, të cilët kanë komunikim të përditshëm ndërkufitar, sidomos studentët, apelojnë të të dy qeveritë që kjo kërkesë të jetësohet sa më parë.