Albin Kurti priti Kryetarin e Këshillit Nacional Shqiptar në Mal të Zi
Sot, në selinë qendrore të Lëvizjes VETËVENDOSJE!, Kryetari Albin Kurti dhe Sekretari për marrëdhënie me jashtë Xhelal Sveçla, pritën në takim Kryetarin e Këshillit Nacional Shqiptar në Mal të Zi, z. Tahir Tahiri.
Në një takim miqësor Albin Kurti e njoftoi z. Tahiri për proceset e dëmshme politike dhe ekonomike me të cilat po ballafaqohet Kosova dhe qëndrimin e VETËVENDOSJE!-s për parandalimin e këtyre proceseve, në mbrojtje të interesit të vendit e në përputhshmëri me vullnetin e qytetarëve të Kosovës.
Nga ana e tij z. Tahiri foli për pozitën politike të shqiptarëve në Mal të Zi dhe problemet të cilat i shqetësojnë ata.
Në takim u bisedua edhe për zgjedhjet e ardhshme parlamentare në Mal të Zi dhe u theksua nevoja që shqiptarët në Mal të Zi duhet të dalin me platformë dhe listë të përbashkët të kandidatëve për deputet, duke krijuar mundësitë për përfaqësim më të plotë, e më të drejtë të interesave dhe vullnetit politik të shqiptarëve në Mal të Zi.
15 shtator 2012
Lëvizja VETËVENDOSJE!