{"id":62857,"date":"2012-08-11T18:49:25","date_gmt":"2012-08-11T17:49:25","guid":{"rendered":"http:\/\/www.visit-ulcinj.com\/blog\/?p=62857"},"modified":"2012-08-13T18:31:38","modified_gmt":"2012-08-13T17:31:38","slug":"panairi-i-ulqinit-pa-botues-nga-kosova","status":"publish","type":"post","link":"https:\/\/www.visit-ulcinj.com\/blog\/2012\/08\/11\/panairi-i-ulqinit-pa-botues-nga-kosova\/","title":{"rendered":"Panairi i Ulqinit, pa botues nga Kosova"},"content":{"rendered":"

\"\"<\/a>Ulqin, 10 gusht\u00a0\u00a0 – Drejtori i Qendr\u00ebs p\u00ebr Kultur\u00eb, Nail Draga, ka kujtuar se libri \u00ebsht\u00eb miku m\u00eb i mir\u00eb i t\u00eb gjith\u00ebve, por botuesit kan\u00eb dal\u00eb t\u00eb mos jen\u00eb aq miq\u00ebsor\u00eb me panairin e librit \u201cUlqini 2012\u201d. N\u00eb fjal\u00ebn e tij n\u00eb hapje t\u00eb edicionit t\u00eb dymb\u00ebdhjet\u00eb t\u00eb panairit, t\u00eb m\u00ebrkur\u00ebn mbr\u00ebma, i pari i institucionit q\u00eb organizon k\u00ebt\u00eb ngjarje kulturore, ka p\u00ebrmendur edhe kriz\u00ebn e librit. E kriza duket se ka goditur edhe panairin e sivjetm\u00eb.<\/p>\n

Me jo m\u00eb shum\u00eb se dhjet\u00eb botues e shit\u00ebs librash vjen oferta p\u00ebr lexuesit. N\u00eb mesin e tyre nuk ka asnj\u00eb botues nga Kosova. Mungojn\u00eb edhe botues t\u00eb m\u00ebdhenj nga Shqip\u00ebria p\u00ebrderisa n\u00eb nat\u00ebn e par\u00eb, n\u00eb rendin e shtandeve t\u00eb vendosur n\u00eb t\u00eb djatht\u00eb t\u00eb sh\u00ebtitores n\u00eb Ran\u00eb – n\u00eb rrug\u00ebn q\u00eb \u00e7on p\u00ebr n\u00eb Kala – dy prej tyre kan\u00eb qen\u00eb bosh. Megjithat\u00eb Draga e ka mbyllur fjalimin me optimiz\u00ebm.<\/p>\n

\u201cShpresojm\u00eb q\u00eb n\u00eb panairet e ardhshme t\u00eb jen\u00eb t\u00eb pranish\u00ebm botues me renome jo vet\u00ebm nga hap\u00ebsira mbar\u00ebshqiptare, por edhe t\u00eb gjith\u00eb t\u00eb tjer\u00ebve t\u00eb nivelit ballkanik\u201d, ka th\u00ebn\u00eb ai n\u00eb nj\u00eb ceremoni krejt t\u00eb thjesht\u00eb tek ia ka dh\u00ebn\u00eb fjal\u00ebn kryetarit t\u00eb Komun\u00ebs s\u00eb Ulqinit, Nazif Cungu.<\/p>\n

\u201cNj\u00eb tradit\u00eb e bukur q\u00eb vazhdon prej 12 vitesh\u201d, e ka cil\u00ebsuar Cungu, panairin e librit. P\u00ebr Cungun, panairi i jep Ulqinit nj\u00eb dimension t\u00eb ve\u00e7ant\u00eb t\u00eb lidhjes s\u00eb tij me librin, dijen e artin.<\/p>\n

\u201cP\u00ebr intelektual\u00ebt dhe njer\u00ebzit e pen\u00ebs ky panair mbetet promotor i krijimeve me vlera t\u00eb mir\u00ebfillta qofshin ato artistike apo shkencore\u201d, ka th\u00ebn\u00eb Cungu. Kreu i qytetit me rreth 25 mij\u00eb banor\u00eb, nuk e ka l\u00ebn\u00eb pa b\u00ebr\u00eb nj\u00eb premtim. Ka th\u00ebn\u00eb se do t\u00eb mb\u00ebshtes\u00eb librin jo vet\u00ebm n\u00eb kuptimin financiar. \u201cPor edhe n\u00eb forma t\u00eb tjera t\u00eb cilat do t\u00eb ndikojn\u00eb q\u00eb libri t\u00eb jet\u00eb sa m\u00eb shum\u00eb i pranish\u00ebm te lexuesi\u201d, ka th\u00ebn\u00eb Cungu.<\/p>\n

Zyrtarisht ai e ka shpallur t\u00eb hapur panairin e librit \u201cUlqini 2012\u201d e fill pas tij, n\u00eb \u201cplay back\u201d ia ka th\u00ebn\u00eb k\u00ebng\u00ebs Ramadan Krasniqi – Dani. Taksa zyrtar\u00ebt kan\u00eb cak\u00ebrruar gotat, Dani i ka k\u00ebnduar tradhtis\u00eb a trishtimit nga dashuria e humbur. N\u00eb publik shumica kan\u00eb qen\u00eb kalimtar\u00eb rasti.<\/p>\n

\u201cM\u00eb trishton q\u00eb nuk ka botues nga Kosova\u201d, ka th\u00ebn\u00eb nja pes\u00eb minuta pas hapjes solemne t\u00eb panairit, Apostol Duka. Ky librashit\u00ebs nga Shqip\u00ebria q\u00eb prezantohet si botuesi \u201cLabova\u201d, edhe n\u00eb nat\u00ebn e par\u00eb t\u00eb panairit ka vazhduar t\u00eb shes\u00eb libra pak metra larg shtandeve ku ka z\u00ebn\u00eb vend tash nja nj\u00ebzet dit\u00eb.<\/p>\n

\u201cJam v\u00ebrtet i trishtuar edhe q\u00eb nuk ka m\u00eb shum\u00eb botues nga Shqip\u00ebria\u201d, shton Duka teksa sqaron se edhe n\u00eb panair, sht\u00ebpia e tij ka marr\u00eb nj\u00eb shtand p\u00ebr t\u00eb cilin paguhet 10 euro n\u00eb dit\u00eb, por vet\u00eb ai nuk e \u201ctradhton\u201d vendin n\u00eb hyrje t\u00eb sh\u00ebtitores ku nuk paguan asnj\u00eb cent. Por Duka thot\u00eb se mungesa e botuesve \u00ebsht\u00eb kompensuar. \u201cBotuesit mungojn\u00eb, por jo edhe librat e tyre. V\u00ebrtet nuk jan\u00eb botuesit, por librat e tyre kan\u00eb ardhur\u201d, ka th\u00ebn\u00eb ai teksa bised\u00ebn ia nd\u00ebrpret pyetja e nj\u00eb lexueseje p\u00ebr \u00e7mimin e \u201cKanunit t\u00eb Lek Dukagjinit\u201d. P\u00ebr Panairin e Ulqinit – ku ai thot\u00eb se merr pjes\u00eb prej edicionit t\u00eb par\u00eb ashtu si edhe n\u00eb at\u00eb t\u00eb Prishtin\u00ebs – Duka ka fjal\u00eb t\u00eb mira. \u201c\u00cbsht\u00eb gjithsesi nj\u00eb ngjarje e bukur n\u00eb qytetin e Ulqinit\u201d, ka th\u00ebn\u00eb ai. \u201cMbase nuk e ka lavdin\u00eb e panaireve n\u00eb qytete t\u00eb m\u00ebdha, po e ka sharmin e intimitetin e vet\u201d.<\/p>\n

E intimiteti i Panairit t\u00eb Ulqinit v\u00ebrehet ashiqare n\u00eb shtandin e asociacionit \u201cUlqini\u201d. Tek b\u00ebjn\u00eb xhiro n\u00eb korzo, nj\u00eb grup ulqinak\u00ebsh e pyesin botuesin lokal, Gazmend \u00c7itaku, n\u00ebse sezoni i shitjes s\u00eb librit \u00ebsht\u00eb m\u00eb i mir\u00eb se sa ai turistik. Vend\u00ebsit ankohen q\u00eb kjo ver\u00eb me fillim nuk ka qen\u00eb fort \u201cbereqetshme\u201d. Por hesapet e \u00c7itakut q\u00eb n\u00eb nat\u00ebn e par\u00eb t\u00eb panairit jan\u00eb pozitive.<\/p>\n

\u201cKa interesim p\u00ebr librin shqip. Panairi \u00ebsht\u00eb i vizituesh\u00ebm\u201d, ka th\u00ebn\u00eb \u00c7itaku pak minuta para mesnat\u00ebs p\u00ebrderisa disa nga koleg\u00ebt e tij kishin mbledhur librat duke e \u201cshpallur\u201d t\u00eb mbyllur nat\u00ebn e par\u00eb t\u00eb Panairit. Bashk\u00eb me \u201cArt Clubin\u201d, n\u00eb edicionin sivjetm\u00eb t\u00eb ekspozit\u00eb ekspozit\u00ebs s\u00eb librit, kan\u00eb sjell\u00eb dhjet\u00eb tituj t\u00eb rinj.<\/p>\n

\u201cE konsideroj sukses shum\u00eb t\u00eb madh q\u00eb p\u00ebr nj\u00eb qytet si Ulqini, t\u00eb dalin kaq tituj t\u00eb rinj p\u00ebr k\u00ebto shtat\u00eb, tet\u00eb muajt e fundit\u201d, ka th\u00ebn\u00eb ai. Megjithat\u00eb ai i kthehet s\u00ebrish muhabetit t\u00eb panairit. \u201cSivjet organizimi \u00ebsht\u00eb pak m\u00eb i dob\u00ebt. Munges\u00eb shum\u00eb e madhe \u00ebsht\u00eb ajo e botuesve nga Kosova. Nuk e di a na bojkotojn\u00eb apo si \u00ebsht\u00eb puna\u201d, ka th\u00ebn\u00eb ai. \u00c7itaku z\u00eb p\u00ebr fjale p\u00ebrfaq\u00ebsuesit e Shoqat\u00ebs s\u00eb Botuesve t\u00eb Kosov\u00ebs dhe ata t\u00eb Unionit. \u201cN\u00ebnkryetari i ShBK-s\u00eb, Besian Zeneli, ka th\u00ebn\u00eb se nuk u interesojn\u00eb panairet e vogla, por ato t\u00eb m\u00ebdhat\u00eb. Ne kemi marr\u00eb pjes\u00eb edhe n\u00eb Panairin e Frankfurtit, por dalim edhe k\u00ebtu. Edhe p\u00ebrfaq\u00ebsuesi i Unionit t\u00eb Botuesve, Behxhet Bici, n\u00eb momentet e fundit \u00ebsht\u00eb t\u00ebrhequr nga pjes\u00ebmarrja\u201d, ka th\u00ebn\u00eb \u00c7itaku. N\u00ebnkryetari i ShBK-s\u00eb, nj\u00eb jav\u00eb para hapjes s\u00eb Panairit t\u00eb Librit n\u00eb Ulqin, kishte th\u00ebn\u00eb p\u00ebr gazet\u00eb se ani pse deri at\u00ebher\u00eb nuk kishin marr\u00eb ftes\u00eb p\u00ebr pjes\u00ebmarrje – nuk besonte se do t\u2019i p\u00ebrgjigjeshin pozitivisht.<\/p>\n

\u201dPor ne kemi nevoj\u00eb p\u00ebr bashk\u00ebpunim dhe shpresoj q\u00eb vitin ardhsh\u00ebm do t\u00eb jen\u00eb k\u00ebtu\u201d, thot\u00eb \u00c7itaku, nj\u00ebri nga botuesit e pakt\u00eb n\u00eb qytetin me shumic\u00eb shqiptare.<\/p>\n

Panairi i Librit – i cili konsiderohet si nj\u00ebra nd\u00ebr ngjarjet kryesore kulturore n\u00eb Ulqin bashk\u00eb me Sken\u00ebn Verore e cila po mbahet n\u00eb Kala dhe Kalimer\u00ebn Poetike, edicioni i 20-t\u00eb i s\u00eb cil\u00ebs u mbajt n\u00eb fillim t\u00eb k\u00ebtij muaji – do t\u00eb jet\u00eb i hapur deri t\u00eb diel\u00ebn.<\/p>\n

Koha Net<\/strong><\/p>\n\n\t\t