{"id":65622,"date":"2012-11-13T07:46:43","date_gmt":"2012-11-13T06:46:43","guid":{"rendered":"http:\/\/www.visit-ulcinj.com\/blog\/?p=65622"},"modified":"2012-11-13T07:48:10","modified_gmt":"2012-11-13T06:48:10","slug":"meshari-i-gjon-buzukut-ne-biblioteken-kombetare-ne-tirane-video","status":"publish","type":"post","link":"https:\/\/www.visit-ulcinj.com\/blog\/2012\/11\/13\/meshari-i-gjon-buzukut-ne-biblioteken-kombetare-ne-tirane-video\/","title":{"rendered":"Meshari i Gjon Buzukut n\u00eb Bibliotek\u00ebn Komb\u00ebtare n\u00eb Tiran\u00eb – Video"},"content":{"rendered":"

Nga Vatikani n\u00eb Tiran\u00eb p\u00ebr t\u2019u ekspozuar n\u00eb Bibliotek\u00ebn Komb\u00ebtare, nga data 12 deri m\u00eb 28 n\u00ebntor 2012<\/strong><\/p>\n

\"\"Tiran\u00eb, 13 n\u00ebntor 2012 \u2013 P\u00ebr her\u00eb t\u00eb par\u00eb po ekspozohet n\u00eb Shqip\u00ebri vepra origjinale “Meshari” i Gjon Buzukut, n\u00eb mjediset e Bibliotek\u00ebs Komb\u00ebtare, ku do t\u00eb q\u00ebndroj\u00eb deri n\u00eb fund t\u00eb k\u00ebtij muaji.<\/p>\n

Pas nj\u00eb k\u00ebrkese t\u00eb autoriteteve shqiptare<\/a>, n\u00eb kuad\u00ebr t\u00eb 100-vjetorit t\u00eb Pavar\u00ebsis\u00eb, vepra q\u00eb njihet si libri i par\u00eb shqip, i botuar n\u00eb vitin 1555, erdhi nga Biblioteka Apostolike e Vatikanit, pasditen e djeshme.<\/p>\n

N\u00eb ceremonin\u00eb e ekspozimit t\u00eb librit, ku ndodhej edhe kryeministri Berisha, drejtori i Bibliotek\u00ebs Komb\u00ebtare, Aurel Plasari, tha se ardhja n\u00eb Shqip\u00ebri p\u00ebr her\u00eb t\u00eb par\u00eb e ekzemplarit t\u00eb vet\u00ebm t\u00eb \u201cMesharit\u201d \u00ebsht\u00eb nj\u00eb ngjarje historike. “Buzuku \u00ebsht\u00eb autori m\u00eb i studiuar n\u00eb kultur\u00ebn shqiptare dhe studiuesit q\u00eb jan\u00eb marr\u00eb me vepr\u00ebn e tij nuk kan\u00eb patur mund\u00ebsin\u00eb ta ken\u00eb n\u00eb duar vepr\u00ebn origjinale dhe t\u00eb punojn\u00eb me t\u00eb\u201d, tha Plasari.<\/p>\n

\"\"“Meshari” \u00ebsht\u00eb ekspozuar n\u00eb Bibliotek\u00ebn Komb\u00ebtare, p\u00ebrkrah botimeve t\u00eb ndjek\u00ebsve t\u00eb tij, si Matr\u00ebnga, Budi, Bardhi, Bogdani, Kazazi, Variboba, etj. Libri \u00ebsht\u00eb i vendosur n\u00eb nj\u00eb inkubator, i cili plot\u00ebson t\u00eb gjitha kushtet klimatike n\u00eb t\u00eb cilat duhet t\u00eb q\u00ebndroj\u00eb libri. Nj\u00eb korrier nga Biblioteka Apostolike e Vatikanit ka sjell\u00eb librin pasditen e 11 n\u00ebntorit n\u00eb Aeroportin \u201cN\u00ebn\u00eb Tereza\u201d, ku \u00ebsht\u00eb pritur nga p\u00ebrfaq\u00ebsues t\u00eb MTKRS-s\u00eb.<\/p>\n

P\u00ebrve\u00e7 siguris\u00eb q\u00eb plot\u00ebson Biblioteka Komb\u00ebtare, \u201cMeshari\u201d i Buzukut do t\u00eb ruhet edhe nga forca t\u00eb Policis\u00eb s\u00eb Shtetit gjat\u00eb 24 or\u00ebve.<\/p>\n

“Meshari” i Gjon Buzukut, q\u00eb njihet si libri i par\u00eb shqip (1555), ka 188 faqe dhe i mungojn\u00eb 16 faqet e para, por edhe disa t\u00eb tjera n\u00eb mes. Duke mos pasur kopertin\u00ebn dhe faqen e par\u00eb n\u00eb origjinal, realisht nuk dihet titulli i tij i v\u00ebrtet\u00eb dhe as vendi i botimit. Emri i autorit dhe i t\u00eb atit, s\u00eb bashku me koh\u00ebn q\u00eb ka zgjatur puna p\u00ebr t\u00eb, 20 mars 1554 deri m\u00eb 5 janar 1555, jan\u00eb n\u00eb pasth\u00ebnien e vepr\u00ebs.<\/p>\n

Gjuha e vepr\u00ebs \u00ebsht\u00eb ajo e dialektit t\u00eb Shqip\u00ebris\u00eb veriore e per\u00ebndimore. P\u00ebr disa tinguj t\u00eb shqipes si q, gj, th, dh, z, x, etj; q\u00eb nuk i p\u00ebrkasin gjuh\u00ebs latine, autori p\u00ebrdor pes\u00eb shkronja q\u00eb kan\u00eb p\u00ebrngjasim me disa shkronja t\u00eb alfabetit cirilik. P\u00ebrmbajtja e vepr\u00ebs d\u00ebshmon p\u00ebr p\u00ebrdorimin e shqipes n\u00eb sh\u00ebrbesat fetare. Kryesisht ka pjese liturgjike, pjes\u00eb q\u00eb lexohen vet\u00ebm prej klerik\u00ebve n\u00eb sh\u00ebrbesat kishtare, p\u00ebrkthim i nj\u00eb libri latinisht i shkruar me alfabetin latin.<\/p>\n

\"\"<\/a>Ndoshta po ta kishte kopertin\u00ebn ose faqen e par\u00eb, libri mund t\u00eb ishte zhdukur, sepse, me sa duket, ka qen\u00eb n\u00eb list\u00ebn e atyre librave q\u00eb kan\u00eb qen\u00eb ndaluar. K\u00ebshtu q\u00eb jan\u00eb zhdukur nga qarkullimi t\u00eb gjitha kopjet e tij dhe mbeti vet\u00ebm kjo q\u00eb \u00ebsht\u00eb e gjymtuar, q\u00eb me sa duket ka qen\u00eb p\u00ebrdorur shum\u00eb. Ve\u00e7 flet\u00ebve t\u00eb grisura, n\u00eb shum\u00eb faqe anash ka sh\u00ebnime e emra prift\u00ebrinjsh, q\u00eb, me sa duket, e kan\u00eb pasur n\u00ebp\u00ebr duar.<\/p>\n

Krahas “Mesharit” origjinal \u00ebsht\u00eb ekspozuar edhe nj\u00eb riprodhim fotografik i librit, sjell\u00eb n\u00eb Shqip\u00ebri nga studiuesi At Justin Rrota, n\u00eb vitin 1929 dhe q\u00eb ndodhet n\u00eb fondin e BKSH-s\u00eb.<\/p>\n

http:\/\/www.shqiptariiitalise.com
\n<\/strong>
\n