Jakup Krasniqi ka paralajmëruar që Mali i Zi së shpejti do ta njohë pavarësinë e Kosovës
Kryetari i Kuvendit, Jakup Krasniqi ka paralajmëruar që Mali i Zi së shpejti do ta njohë pavarësinë e Kosovës. Indirekt, këto deklarata janë konfirmuar edhe nga Kryeministri malazias, Milo Djukanovic.
Prishtinë, 21 qershor — Kryetari i Kuvendit të Kosovës, Jakup Krasniqi ka thënë se ka konfirmim pozitiv nga zyrtarët më të lartë malaziasë që së shpejti zyrtarisht do ta njohin pavarësinë e Kosovës.“Kemi konfirmimin pozitiv nga zyrtarët më të lartë se Mali i Zi, së shpejti zyrtarisht do ta pranojë pavarësinë e Kosovës, pasi Mali i Zi nuk dëshiron të kthehet prapa kundër dëshirës së proceseve evropiane”, ka thënë Krasniqi për gazetën më të njohur të Podgoricës,
“Vijesti”.Zyrtarët malaziasë kanë njoftuar se do ta pranojnë pavarësinë e Kosovës, por në këtë njoftim nuk kanë saktësuar se kur kjo mund të ndodhë.Kryeministri Milo Djukanovic,sipas gazetës, para 15 ditëve ka qenë disi eksplicit, edhe pse, as ai nuk ka folur rreth datës së njohjes së Kosovës së pavarur.
Djukanovic ka thënë se kur të merret vendimi për njohjen e Kosovës nga Mali i Zi, nuk do të jetë në interesat e të tjerëve, ashtu siç ka qenë historikisht.“E respektojmë shumë historinë e përbashkët dhe afërsinë me Serbinë. Por as kjo nuk jep të drejtë të presë kushdo qoftë. Mali i Zi nuk mund t’i rrezikojë interesat e veta për serbët.
Emocionet janë tjetër gjë, ndërsa interesi është tjetër”, ka thënë kryeministri malazias, Milo Djukanovic.Ai ka njoftuar se është në interes të Malit të Zi që në të ardhmen e afërt të jetë pjesë e BE-së dhe NATO-s dhe është i bindur në atë rrugë, “duke ndërtuar marrëdhëniet më të mira me fqinjët”.“Jemi shumë të gatshëm në këtë drejtim. Nuk jemi të gatshëm të jemi pjesë e iluzioneve ndaj çfarëdo adrese që arrin.Ndoshta jemi të gatshëm t’i kuptojmë,por nuk jemi të gatshëm t’iu bashkohemi dhe në këtë drejtim të tregojmë afërsi dhe respektim të historisë së përbashkët”.Deri më tani, nga shtetet e Ballkanit perëndimor, pavarësinë e Kosovës e kanë pranuar Kroacia dhe Shqipëria.Një zyrtar i lartë i Partisë Demokratike Socialiste ka thënë për “Vijesti” që më nuk është e largët dita kur Qeveria e Malit të Zi do të marrë vendim për njohjen e Kosovës.Në një bisedë jozyrtare, ky zyrtar nga partia qeveritare ka thënë se kjo mund të ndodhë gjatë verës.Ai ka shtuar se ndër të tjera,pritet që edhe Serbia të zgjedhë qeverinë e re proevropiane.
Autor / Gazeta Express