Ulqini, vendtakim i dy zemrave të Kaltrina Selimit dhe Driton Stublles
‘Për Dritonin do ta lija këngën’
“Nuk mund të them se fejesa ka ndryshuar diçka në personalitetin tim, përveçse tani kam një status tjetër. Sa i përket lidhjes sonë me kurorëzimin e fejesës, veç është forcuar dashuria më tepër”, shprehet Kaltrina
Këngëtarja Kaltrina Selimi është e fejuar me një djalosh, i cili jeton në Londër. Ajo dhe Driton Stublla janë një çift simpatik. Ata dashurinë e tyre e kurorëzuan me fejesë disa javë më parë. Propozimin për fejesë Kaltrina e mori pikërisht në ditëlindjen e saj, që ishte një befasi për te, ngase këtë propozim as që e kishte pritur atë ditë. Çifti tani kanë plane të shumta, por parësore për ta do të jetë martesa, të cilën Kaltrina thotë se ndoshta mund të ndodhë vitin e ardhshëm. Për më shumë rreth dashurisë së tyre Kaltrina flet për “Kosova Sot”.
Ulqini, vendtakim i dy zemrave
“Kosova Sot”: Si erdhi deri te njohja juaj me Dritonin?
Kaltrina Selimi: Me Dritonin jemi takuar para katër vjetëve. Jemi takuar në sezonin e verës, përderisa po i kaloja pushimet në Ulqin. Ishim me një shoqëri dhe kështu që përmes shoqërisë u njoha me të.
“Kosova Sot”: Si lindi dashuria në mes jush?
Kaltrina Selimi: Gjithçka lindi në mënyrë shumë të veçantë, shumë interesante… asnjëherë se kishim menduar se do të dashuroheshim, e aq më tepër se do të krijonim një lidhje aq të fortë. Në fillim kishim vetëm simpati ndaj njëri-tjetrit, por të cilën e shprehnim gjithmonë përmes ‘’kritikave dhe akuzave’’, kur diskutonim për ndonjë temë apo çështje të caktuar.
“Kosova Sot”: Sa kohë keni kaluar fshehurazi?
Kaltrina Selimi: Nuk kemi kaluar shumë fshehurazi, kanë qenë rreth dy muaj që nuk e ka ditur askush se e kemi filluar lidhjen e dashurisë.
“Kosova Sot”: Jeni fejuar pikërisht në ditëlindjen tënde, e keni pritur propozimin e fejesës pikërisht në këtë ditë?
Kaltrina Selimi: Jo, nuk e prisja, nuk më ka shkuar fare në mëndje se Dritoni do të më propozojë fejesën pikërisht në ditëlindjen time. Ishte një befasi për mua.
Fejesa
“Kosova Sot”: Tani, meqë jeni e fejuar, çfarë ka ndryshuar fejesa tek personaliteti juaj?
Kaltrina Selimi: Nuk mund të them se fejesa ka ndryshuar diçka në personalitetin tim, përveçse tani kam një status tjetër. Sa i përket lidhjes sonë me kurorëzimin e fejesës, veç është forcuar dashuria më tepër.
“Kosova Sot”: Nëse do të ishte e domosdoshme të bënit një zgjedhje, më parë do ta zgjedhje jetën me Dritonin dhe të ndaheni nga kënga, apo do ta zgjedhje këngën e jo Dritonin?
Kaltrina Selimi: Muzika do të thotë shumë për mua. Këtu ku jam sot për mua ka qenë dikur vetëm ëndërr, por meqë e kam domosdoshmërisht të zgjedh vetëm njërën nga këto, atëherë pa menduar fare do e lija këngën dhe do e zgjedhja jetën me Dritonin.
“Kosova Sot”: Sa ka xhelozi në mes jush?
Kaltrina Selimi: Mendoj se ku ka dashuri ka edhe xhelozi, kështu që unë jam pak xheloze. Por, megjithatë, edhe Dritoni diku në brendi me siguri është xheloz, mirëpo është natyrë që nuk e shpreh.
Më temperamente se i dashuri
“Kosova Sot”: Cili jeni më temperament?
Kaltrina Selimi: Unë definitivisht jam më temperamente, kurse Dritoni është shumë i qetë dhe e kontrollon shumë mirë veten.
“Kosova Sot”: E keni vendosur datën e martesës?
Kaltrina Selimi: Jo, ende nuk kemi vendosur asgjë definitive, këtë vit nuk do të martohemi, e sa i përket vitit të ardhshëm ndoshta mund edhe të kemi dasmë.
“Kosova Sot”: Planet për të ardhmen?
Kaltrina Selimi: Për të ardhmen plane kemi shumë, por do t’ia lëmë kohës t’i zbulojë ato.
K. BAJRAMI
Kosova Sot