Nganjëherë ajo që duket në sipërfaqe nuk arrin të na tregojë shumëçka nga brendësia e saj. Në rastin konkret, ne kemi disa foto të këngëtares Rovena Stefa, me të cilat ka vendosur të realizojë një kalendar për vitin 2010, por nuk mund ta imagjinojmë se si janë realizuar ato. Disa prej atyre fotove, ku Rovena përshfaq gjithë sensualitetin e saj me veshje transparente dhe pa të brendshme, nuk janë bërë në një ditë të nxehtë vere, por vetëm pak ditë më parë tek Liqeni Artificial i Tiranës, ku temperatura ishte 10 gradë. Duke qenë shumë e impenjuar me koncerte kryesisht jashtë vendit, këngëtarja e kishte shtyrë pafund projektin e saj, që konkludonte në një kalendar, aq sa përfundoi që fotot më të zhveshura t’i realizojë në ditët më të ftohta të dimrit. Fotografi kosovar Nexhat Berhami e fotografonte Rovenën për herë të parë, por këndvështrimi i tij ka bërë që Rovena të ketë në arkivën e saj disa foto shumë të veçanta. Megjithatë ajo ka preferuar që në kalendar të ketë foto të disa fotografëve si Fadil Berisha dhe Feliks Bilani. Gjithsecili ka arritur të tregojë një Rovenë ndryshe ku fashioni, sensualiteti, ekstravaganca, klasikja duket sikur rrinë shumë mirë krah njëra-tjetrës.
Nexhati ka arritur të tregojë Rovenën një natyrë poetike, në paqe me veten. Fotot e realizuara prej tij mund të ishin fare mirë kopertina novelash, me nota paksa dramatike. Më pas po ky fotograf guxon të risjellë Krishtin në disa foto të Rovenës me veshje të bardhë e të gjatë, shumë melankonike dhe me një fytyrë ujë e sapun. Këngëtarja tregon se Nexhati duke qenë vetë model, përveçse fotograf, di të jetë kreativ me aparatin e tij dhe të nxjerrë më të mirën nga shkrepjet që bën.
Këngëtarja ka vendosur që këtë set fotografish ta vendosë në një kalendar dhe është hera e parë që kjo këngëtare realizon një të tillë. E pyetur për fotot dhe për sensualitetin që ato përcjellin, këngëtarja tregon se do t’i kishte pëlqyer të kishte edhe foto më seksi, por mentaliteti i shqiptarëve nuk është akoma i përgatitur për foto të tilla, aq më tepër për një kalendar që hyn në një familje dhe mbahet një vit në mur. Pastaj Rovena Stefa ka eksperiencën e freskët me klipin “Mall” i cili u bë objekt diskutimi në kohën që doli pasi shqiptarët brenda dhe jashtë vendit ishin shprehur se klipi është shumë erotik dhe nuk mund ta shohin lirshëm në familje. Kjo mbase ka qenë këmbana e alarmit për Rovenën që të mos tentojë më shumë drejt evidentimit të anës së saj seksuale, qoftë edhe në një kalendar. Kjo në fakt do të tingëllonte shumë e prapambetur si ide në çdo vend perëndimor ku personazhet vip, femra të bukura dhe të famshme, zhvishen edhe nudo para aparatit të një fotografi. Madje një femër në karrierë, e ndjen si obligim që të ketë një kalendar me foto të tilla. Ndërkohë, mesa duket tek ne nuk ka arrdhur akoma momenti, ashtu si për shumë gjera të tjera dhe shembulli i Rovenës flet qartë për këtë fakt.

Panorama Plus