Ka vendosur të jetojë në Prishtinë për një kohë, duke realizuar videoklipe të reja, si dhe duke mbajtur shumë koncerte atje. Kanë marrë një apartament dhe së bashku me dy motrat, Elisën (e cila luan rolin e menaxheres) dhe Irvën (një këngëtare e re e skenës), janë adaptuar me kushtet e jetesës në Kosovë. Gati çdo fundjavë, motrat Stefa kanë ftesa për të performuar nëpër lokale të ndryshme në mbarë Kosovën, duke mos përjashtuar intervistat në programe televizive, të cilat nuk janë të pakta. Momentalisht është aktive me klipin më të ri “Mallkuar”, që ka zgjuar kureshtje të madhe tek publiku shqiptar.

Në adresë të Rovenës pat ardhur edhe një ofertë e re, të cilën nuk kishte mundësi ta refuzonte, për shkak të honorarit të majmë që organizatorët e spektaklit ia kishin propozuar këngëtares dhe këto ditë po bëhen përgatitjet e fundit për të filluar një “betejë” të re në karrierën e saj, duke qëndruar e mbyllur në shtëpi, së bashku me personazhe VIP për një muaj e gjysmë. E teksa po bëhet gati për të qenë pjesëmarrëse në spektaklin “Vip Shpija 2”, ajo është parë duke u argëtuar në klube nate në Prishtinë, e shoqëruar nga motrat dhe disa miq të tjerë, duke mbushur kështu bateritë për të dhënë maksimumin në spektakël.

Në anën tjetër, përkrah personazheve të njohur të ekranit,  mësohet se kësaj aventure të re televizive do t’i bashkëngjitet edhe reperi i njohur Mc Kresha. Reperi do të qëndrojë një muaj e gjysmë, së bashku me këngëtaret Rovena Stefa, Ingrid Gjoni, Zajmina Vasjari, Xuxi, Andos, ish-banori i BB, Qetsori, ish-deputeti rom, Zylfi Merxha e shumë personazhe të tjerë.  Spektakli do të fillojë me 1 prill, si edicionin e kaluar ku morën pjesë shumë këngëtarë të njohur, të cilët bënë dhe gafa e skandale pa fund. Për Mc Kreshën, kjo do të jetë një sfidë e re, pasi për herë të parë pas sukseseve të shumta në muzikë, reperi do të provojë veten dhe në një spektakël të këtij formati, ku për një kohë  të gjatë do të qëndrojë brenda shtëpisë, në kushte të cilat ndoshta nuk është mësuar t’i përballojë. Si do të ballafaqohen me realitetin  brenda personazhet e njohura, pritet të shihet. Ndërkohë, rikujtojmë se edicionin e kaluar e kanë fituar humoristët Stupcat dhe këngëtari Bertan Asllani.

 

Vip.shqiperia