Ekspozita e piktores Vahida Hasanaga – Nimanbegu në Sarajevë – Video
Në Galerinë “Black Box” në Sarajevë u hap ekspozita personale e piktores Vahida Hasanaga – Nimanbegu
Piktorja nga Ulqini, Vahida Hasanaga – Nimanbegu, hapi të premten në Galerinë “Black Box” në Sarajevë ekspozitën personale, ku ajo prezantohet me 20 punime të krijuara gjatë periudhës 2012-2014 në teknikën vaj në pëlhurë dhe akrilik në pëlhurë. Ekspozitën e ka hapur prof. mr. Hajrudin Zagora, i cili ka thënë se përshtypja që krijon si vëzhgues i cili për të parën herë ndeshet me veprat e piktores Nimanbegu, është se kemi të bëjmë me një artiste me orientim tematik dhe sensibilitet figurativ specifik.
Ai ka thënë se natyra njerëzore e cila është e ndërtuar nga fije të holla, është madhështore, por e gjymtuar dhe e poshtëruar. “Ekspozitën e autores e përjetoi si një lloj rikujtimi dhe paralajmërimi për këto deficite njerëzore dhe thirrje për nevojën e kthimit tonë ndaj burimeve dhe njerëzores”, ka thënë Zagora. Sipas tij, “shpirti mesdhetar i autores freskon me koloritin e saj memorien tonë mbi bukuritë natyrore dhe të njeriut, detit, qiellit të kaltër dhe diellit – mirësisë ndaj të cilës na obligon të qenit tonë njeri”.
Ai e ka cilësuar ekspozitën e piktores Nimanbegu si një freskim figurativ që i ofrohet popullit të Sarajevës, sepse përbën shmangie nga stereotipet figurative me të cilat takohemi shpesh. Ekspozita e piktores Vahida Hasanaga – Nimanbegu në Sarajevë është realizuar me mbështetjen e Ministrisë së Kulturës së Malit të Zi dhe Qendrës për Ruajtjen dhe Zhvillimin e Kulturës së Pakicave. Vahida Hasanaga Nimanbegu ka mbaruar studimet për art në Beograd.
Përpos Ulqinit dhe Malit të Zi, deri tani ka pasur ekspozita personale edhe në SHBA, Itali, Izrael, Gjermani, Serbi etj. Është laureate e disa çmimeve, si Çmimit Vjetor për pikturë të Shoqatës së Artistëve Figurativë të Malit të Zi, Çmimit të Sallonit të Zemunit etj. Aktualisht drejton shoqatën “Art Dulcinium” e cila merret me art dhe kulturë, si dhe ka organizuar një sërë kolonish artistike.
i.k.
Koha Javore