Dinosha: Mali i Zi të njohë Kosovën sivjet
Kryetari i Unionit Demokratik të Shqiptarëve, Ferhat Dinosha ka paralajmëruar qeverinë malazeze se nuk është në interesin nacional të Malit të Zi që të zvarrisë njohjen e pavarësisë së Kosovës si dhe ka shtuar se Podgorica duhet ta njohë Kosovën ketë vit në paketë, së bashku me Shkupin zyrtar.
“Ndoshta do të ishte më mirë që njohja e pavarësisë së Kosovës të kryhet në paketë së bashku me Maqedoninë. Të dy shtetet janë në rrugën e integrimit dhe njohja do të vlerësohej si hap i rëndësishëm”, ka deklaruar Dinosha.
Njëkohësisht Dinosha ka shtuar se është i gatshëm që të ndërmjetësojë te institucionet e Malit të Zi dhe Kosovës, që malazezët të kthehen në Kushtetutën e Kosovës.
Në pyetjen se pse Mali i Zi nuk e ka njohur Kosovën në maj siç është pritur, Dinosha ka thënë: “Nëse nuk ka ndodhur në maj, nuk do të thotë që nuk do të ndodh këtë vit”.
“Mali i Zi duhet të ndjek hapat e shteteve të rajonit dhe pikërisht jam duke menduar në Shkupin zyrtar. Mendoj se do të ishte mirë që njohja të bëhet në paketë me Maqedoninë”, është shprehur Dinosha.
“Mali i Zi duhet të shikojë interesin e vet nacional dhe nuk duhet të vihet në rend të parë interesi i Serbisë. Tashmë është e qartë se interesi i Podgoricës është njohja e pavarësisë dhe se njohja nuk duhet të sjellë inat askujt”.
Autor / Gëzim Ibroçi
Burimi / Telegrafi