Një motoskaf për siguri më të madhe
Ulqini është komuna e pestë bregdetare që fitoi donacion nga qeveria ,amerikane në kuadër të programit për sigurinë e kufijve të Malit të Zi.
Ulqin – Ndihmësdrejtori i Drejtorisë së Policisë, Vesko Vukadinoviq, dhe kryetari i Komunës së Ulqinit, Gëzim Hajdinaga, bënë të premten në mënyrë ceremoniale pranim dorëzimin e një motoskafi për policinë kufitare të Malit të Zi e që do të përdoret në territorin e komunës së Ulqinit.
Motoskafi i cili mban emrin “Ulqini” është donacion i Qeverisë amerikane në kuadër të relizimit të Programit për sigurinë e kufijve të Malit të Zi, kurse Ulqini është komuna e pestë bregdetare në Mal të Zi që ka fituar një anije të tillë.
Sipas ndihmësdrejtorit Vukadinoviq, njëkohësisht udhëheqës i sektorit të policisë kufitare, motoskafi do të përdoret në radhë të parë për ruajtjen e kufirit ujor të Malit të Zi.
“Përveç kësaj detyre parësore, pra kontrollimit të kufirit shtetëror, anija do të jetë në dispozicion të pushtetit lokal, inspeksioneve të tjera që kanë kompetencë në det dhe në lumin Buna”, tha ai.
Ndërsa kryetari i Komunës së Ulqinit vlerësoi bashkëpunimin e mirë ndërmjet Komunës së Ulqinit dhe Drejtorisë së Policisë së Malit të Zi.
“Ky është edhe një shembull i mirë i bashkëpunimit të pushtetit lokal me Drejtorinë e Policisë. Komuna është e hapur dhe normalisht pa bashkëpunimin me Drejtorinë e Policisë nuk mund t`u garantojmë qytetarëve qetësi”, tha ai.
(Kohapress)