Inspeksioni Komunal mënjanoi të shtunën kryqin e vendosur në vendin e njohur si guri i madh afër limanit në Ulqin
Ulqin – Inspeksioni komunal me ndihmën e policisë së Ulqinit ka mënjanuar të shtunën kryqin e vendosur në ujdhesën e njohur si Guri i Madh afër Limanit, në afërsi të Kalasë së Ulqinit.
Kryqi me lartësi prej katër metrash ishte vendosur një natë më parë nga Gjorgje Zhivanoviq, qytetar i Ulqinit, kurse të shtunën, më 28 qershor në orët e pasdites ishte planifikuar të bëhej bekimi i tij.
Drejtoria e Policisë ka njoftuar se policia ka marrë në pyetje Zhivanoviqin, por nuk e ka ndaluar atë. Sipas policisë, rasti do t`i paraqitet prokurorit shtetëror dhe gjykatësit për kundërvajtje me qëllim të procesuimit eventual.
Vendosja e kryqit ka shkaktuar reagime të shumta.
Kryetari i Komunës së Ulqinit, Gëzim Hajdinaga, në një konferencë për shtyp ka thënë se një hap i tillë mund të ketë pasoja negative për Ulqinin që me të drejtë cilësohet si shembull i multikulturës dhe tolerancës ndëretnike dhe fetare.
“Ne jemi plotësisht të bindur se askujt nuk do t`i shkojë për dore të luhasë marrëdhëniet ndëretnike dhe ndërfetare në Ulqin dhe se Ulqini do të vazhdojë të jetë shembull dhe model edhe për mjedise të tjera”, ka thënë ai.
Hajdinaga ka kërkuar nga organet e rendit dhe të hetuesisë zbardhjen e ngjarjes dhe ndëshkimin e aktorëve të saj.
Vendosja e kryqit është kritikuar edhe nga Kisha Ortodokse Malazeze, e cila e ka vlerësuar këtë akt si përpjekje të prishjes së harmonisë ndërfetare dhe ndërnacionale dhe si përsëritje të ngjarjes së vendosjes së kishës në Rumi.
“Kemi të bëjmë me përsëritjen e ngjarjes së Rumisë në mënyrë që me luftën dhe konfliktin ndërmjet religjioneve dhe kombësive të shkaktohet konflikt ndërfetar dhe ndërnacional prej të cilit do të ketë dobi vetëm Kisha Ortodokse Serbe”, thuhet në kumtesën e Kishës Ortodokse Malazeze.
Edhe shumica e qytetarëve të Ulqinit e kanë kritikuar vendosjen e kryqit duke e cilësuar si veprim provokues që nuk u shërben marrëdhënieve të mira ndërfetare dhe ndërnacionale në këtë qytet.
Autor / i.kallaba
Burimi /Koha Javore