PODGORICE-Nënkryetari i partisë në pushtet në Mal të Zi, Svetozar Marovic deklaron se Mali i Zi ndodhet nën presion për ta njohur pavarësinë e Kosovës.
Në një intervistë për Televizionin e Malit të Zi, Marovic, nënkryetar i Partisë Demokratike të Socialistëve (DPS), tha se çështja e Kosovës është shumë e ndjeshme dhe se nuk ka afate të caktuara se kur Mali i Zi duhet të deklarohet për pavarësinë e Kosovës.
Megjithatë, ai u shpreh se ka presione, ndërsa shtoi se nga pushteti nuk mund të pritet që çështja e Kosovës të vihet në peshw me çështjen e integrimeve evropiane.
Kjo, sipas tij, do të thotë se “Mali i Zi sigurisht se do të vihet në një pozitë kur duhet të zgjedhë se çka është më e rëndësishme për të – të shkojë drejt Europës dhe anëtarësimit të plotë në institucionet evropiane – apo të vihet në një situatë kur ato prioritete, që janë synim i Malit të Zi, ndoshta për momentin t’i vendosë në plan të dytë”.
Marovic, i cili e përshkruan Kosovën si realitet, nuk ka dhënë ndonjë datë të caktuar se kur pritet që Mali i Zi të deklarohet për pavarësinë e saj – megjithatë, ai u shpreh se për Kosovën duhet të zhvillohet një diskutim i gjerë në Mal të Zi, madje edhe në Parlament, për “të marrë mendimet e të gjitha partive parlamentare në këtë vend”.
Burimi (s.g/Balkanweb)