Të intensifikohen veprimtaritë e bashkëpunimit
Ulqin – Kryetari i Komunës së Ulqinit, Gëzim Hajdinaga, priti të martën ambasadorin austriak në Podgoricë, Florian Rauning dhe kryetarin e Distriktit 23 të Vjenës, Manfred Wurm.
Në takim u potencua sidomos jetësimi në praktikë i Marrëveshjes së Partneritetit të nënshkruar në muajin maj ndërmjet Komunës së Ulqinit dhe Distriktit 23 të Vjenës, e cila parashikon bashkëpunimin në fusha të ndryshme.
Ambasadori austriak Rauning tha se marrëveshja e cila ekziston në letër duhet të jetësohet në praktikë.

“Unë gëzohem që e keni filluar bashkëpunimin në një sektor shumë interesant dhe të rëndësishëm siç është rinia. Kultura është një sektor tjetër shumë i rëndësishëm. Por duhet të shikojmë që të forcojmë këtë bashkëpunim edhe në shumë segmente të tjerë. Ambasada austriake është e gatshme të punojë me ju në këtë drejtim”, tha ai.Kryetari i Komunës së Ulqinit, Gëzim Hajdinaga, dhe ai i Distriktit 23 të Vjenës, Manfred Wurm, paralajmëruan në të ardhmen e afërt zhvillimin e disa aktiviteteve.

“Me kryetarin Wurm u morëm vesh që në tetor së bashku me ministrin të bëjmë një vizitë në Vjenë. Një delegacion nga Austria do të vijë së shpejti në Podgoricë për të mbajtur ligjërata në disa fusha. Njerëzit tanë do të kenë mundësi të mësojnë diçka nga përvoja Juaj, por edhe ne do të bëjmë vizita kthyese për të parë dhe marrë përvojat e Austrisë në këto fusha”, tha Hajdinaga.
Në takim mori pjesë edhe Fuad Nimani, ministër për Mbrojtjen e të Drejtave të Njeriut dhe Pakicave.
Ambasadori austriak dhe kryetari i Distriktit 23 të Vjenës morën pjesë në koncertin e një grupi artistësh nga Vjena që u mbajt në kuadër të Festivalit “Skena Verore 2008”.
Dy net të edicionit të sivjetshëm të këtij Festivali ishin të rezervuara për artistët nga Austria në kuadër të bashkëpunimit ndërmjet Komunës së Ulqinit dhe Distriktit 23 të Vjenës.
ismet kallaba
Burimi / Koha Javore