Bardhi: Të avancohet ndarja e mandateve të fituara
Lidhja Demokratike në Mal të Zi i dërgoi propozimet dhe qëndrimet e saj komisionit për hartimin e legjislacionit zgjedhor
Mënyra e deritashme e ndarjes së mandateve të fituara të deputetetëve duhet të avancohet në mënyrë që në vendvotimet e veçanta të mundësohet ndarja e mandateve vetëm listave zgjedhore me shenjën dalluese nacionale shqiptare të cilat e plotësojnë censusin e parashikuar, vlerësojnë në Lidhjen Demokratike në Mal të Zi.
Anëtari i Grupit të Punës për hartimin e legjislacionit zgjedhor dhe deputeti i LD në MZ, Mehmet Bardhi, mendon se legjislacioni i deritashëm zgjedhor me disa korrigjime mund të jetë zgjidhje e pranueshme edhe për zgjedhjet e ardhshme shumëpartiake.
Ai ia ka dorëzuar Grupit të Punës qëndrimet dhe propozimet e LD në MZ lidhur me ndryshimet dhe plotësimet e legjislacionit zgjedhor në të cilat thuhet se për këtë parti është e pranueshme që Mali i Zi të jetë i definuar si një njësi zgjedhore.
Bardhi thekson se për popujt pakicë, respektivisht për pakicën kombëtare shqiptare, është e pranueshme zgjidhja e deritashme që në kuadër të Malit të Zi si një njësi zgjedhore, vendvotimet ku jetojnë shqiptarët si autoktonë zgjedhin numër të caktuar deputetësh.
Në LD në MZ vlerësojnë se duhet të ruhet modeli Dont për llogaritjen e numrit të mandateve të deputetëve në Parlament.
“Apo ndonjë formulë tjetër matematikore e cila në mënyrë më korrekte do të japë rezultatet në përllogaritjen proporcionale të numrit të deputetëve”.
Bardhi ka theksuar se duhet të ruhet censusi i deritashëm lidhur me të drejtën e pjesëmarrjes në ndarjen e mandateve të deputetëve, si dhe numri i nënshkrimeve për mbështetjen e listave zgjedhore në të dy rastet.
“Nëse do të ekzistojë klima e mirë politike, vullneti dhe pajtueshmëria, jemi të gatshëm të bisedojmë edhe për njësinë e posaçme zgjedhore për shqiptarët në Mal të Zi. Natyrisht duhet të përpunohet modeli”, ka thënë Bardhi.
Ai ka vlerësuar se të drejtat e arritura nuk guxon të vihen në pikëpyetje.
Burimi / Kohapress