Pretekstet e paqena
Ne shohim të metat dhe veset e të tjerëve, por nuk vëmë re tonat, ashtu siç ndiejmë peshën e një trupi të huaj që duam të zhvendosim, ndërsa durojmë pa u ankuar peshën e trupit tonë.
Qytetaret e Ulqinit jetën e tyre e kanë te lidhur me rrjedhat e sezonit turistik, por që ky i sivjetmi duket se nuk ua plotësoi dëshirën të gjithëve. Ajo që e ka dëmtuar më shumë këte sezon turistik ka qenë “propaganda” e “keqe”, duke i veshur Ulqinit mungesën e kushteve gjatë qëndrimit, strukturën e pushuesve, rritjen e çmimeve, kulturën e pronarëve të objekteve ndaj tyre e të tjera, gjë që duket se u bë me dashakeqësi nga njerëz të caktuar. Tashmë për çdokënd është e qarte se turizmi nuk është vetëm një aktivitet argëtues dhe çlodhës, por është shndërruar në një mënyrë jetese. Të gjithë e kanë të qartë se miliona familje sot në botë synojnë të kenë jo vetëm 10 ditë pushime turistike në vit në kohën e verës, duke menduar kështu edhe për turizmin natyror, kulturor e kështu me radhë. Jemi të vetëdijshëm se në kushtet tona kur mungon infrastruktura turistike, kultura e shërbimit ndaj klientëve, siç shkruajnë e thonë ata, ku shumicën e përbëjnë pronarë kosovarë sidomos të restoranteve e kafiterive në plazhe, nuk kemi si të besojmë se jemi destinacion e produkt turistik, por kjo nuk ndodh vetëm tek ne.

Pajtohem se nuk duhet shpallur “luftë turistike” atyre që nuk pajtohen me ne për shumëçka rreth asaj që ka të bëjë me rrjedhat turistike gjatë këtij sezoni, por nuk pajtohem me ata që pretendojnë se kanë shpenzuar energji për propagandë turistike para fillimit të sezonit nga ku indikacionet kanë qenë të qarta se gjatë prezantimit të ofertës turistike diçka nuk ka funksionuar si duhet, sidomos në Kosovë.
Nëse mediat e shkruara dhe ato elektronike bënë punën e tyre, duke na prezantuar me imazh negativ, duhet të pranojmë mangësitë tona dhe këtë nuk e mohojmë, por ambiente të tilla hasim edhe te “komshitë” tanë, ndaj ne që merremi me gazetari e kishim të vështirë t`u thyenim zemrën të tjerëve për të paraqitur realitetin e për t`u ballafaquar me probleme të së njëjtës natyrë. Për ne është laike të mendohet se Kroacia, Shqipëria e Turqia kanë ambiente më të përshtatshme se Ulqini, edhe pse disa nga këto kanë lidhje historike me ne dhe në asnjë rast nuk duhet anashkaluar qyteti ynë pavarësisht çmimeve, pastërtisë e akomodimit siç duan të arsyetohen disa artikullshkrues të mediave shqiptare siç ndodhi në gazetën “Bota sot” e “Zemra Shqiptare”, apo në televizionet shqiptare private e gjetiu.

U fol e u shkrua shumë në media të shkruara dhe ata elektronike se gjoja Ulqini e ulqinakët për këtë sezon turistike nuk qenë mikpritës të mirë, gjë që nuk përkon me realitetin. U fol me të drejtë për çmimet, por nuk u fol e nuk u shkrua për kushtet e akomodimit, sjelljet e qiradhënësve, kushtet e banimit, gjë që bën të dyshojmë se mos e gjithë kjo ka pasur një prapavijë tjetër karshi këtij qyteti e banorëve ulqinakë. Po le t`i lëmë këto krahasime të cilat, po t`i vazhdojmë, flasin keq për atë që po ndodhë sot në një nga fushat më delikate të ekonomisë turistike në njërën anë dhe imazhin e krijuar nga disa gazetarë për të lobuar kundër këtij qyteti me traditë turistike e kulturore. Nëse të njëjtit kanë hasur në pengesa (mund të jenë të arsyeshme) gjë që ne i pranojmë gabimet tona, por kjo nuk i jep askujt të drejtën për një prezantim të tillë. Çdokund e në çdo vend ka favore, por ka edhe mangësi, për këtë jemi koshient dhe askush nuk është deklaruar se çdo gjë lidhur me turizmin rrjedh “okej”. Ajo që duhet ditur pushuesit është se Ulqini mbart vlera të caktuara, ndryshe nga qytetet tjera bregdetare shqiptare, si restorante cilësore me çmime ekonomike, jetën kulturore të begatshme dhe nëse ka pasur ndonjë keqpërdorim lidhur me çmime kjo nuk guxon të përgjithësohet, andaj ata duhet ta kuptojnë se kush kërkon komoditet të lartë gjen edhe çmime të larta.

Problemi nuk qëndron vetëm këtu, ai është edhe më i madh kur kihet parasysh e dhëna se ne duhet të pranojmë se nuk ishim syçelë për mbarëvajtje të sezonit turisik (këtë do ta analizojnë ) dhe do të japin shifra ata që merren direkt me këtë veprimtari të vetme të Ulqinit, por pse i gjithë ky mllef ndaj qytetit tonë, pse ata që duhet të përgjigjen për këtë heshtin dhe nuk gjejnë forcë morale për t`ju kundërvënë atyre që lobuan kunder Ulqinit. Pra, problemi është që të ballafaqohemi me të vërtetën e ajo është se kemi qenë të lajthitur nga turisti kosovar duke menduar se gjithmonë do të na zgjasin dorën nga ku kësaj radhe nuk ndodhi kështu pavarësisht se dikush don të arsyetohet se ne na duhet turizëm elitar e jo masiv. Për turizmin elitar akoma nuk jemi të përgatitur, duhet kohë, mund e investime kolosale dhe kjo vështirë të arrihet kur e gjithë bota po përjeton krizën ekonomike.

Duhet ditur se të vetmit “besnik që vizitojnë plazhet e Ulqinit janë nga shtresat e mesme e të ulta. Tani më për çdokënd është e qartë se Ulqini është i “bekuar nga perëndia” për potencialet e veta natyrore që akoma janë të pashfrytëzuara sa duhet dhe ajo që të bën përshtypje është se për të patur një turizëm cilësor kërkohet zgjidhje, ndaj mysafirët që kalojnë pushimet këtu paguajnë mirë me kusht që të kënaqen. Në vend që ta shijojnë këtë ata, siç shkruajnë mediat, marrin papastërtinë, zhurmën, cilësinë e shërbimit e të tjera. Duke i përmendur këto e që mendojmë se i kemi eliminuar, atëherë nuk duhet të habitemi pse ky imazh kaq negativ duke humbur kështu edhe ata të fituarit si tregun vendas dhe atë kosovar. Megjithatë, Ulqini ka vend për të gjithë, si për nga shtresat shoqërore ashtu edhe për nga struktura nacionale, prandaj ai ka kontribuar dhe këtë do ta vazhdojnë ta bëjnë për interesat e përgjithshme kombëtare. Duket se ka ardhur koha të hapim sytë dhe të njohim se në fakt pengesa kryesore është mungesa e vizionit territorial dhe mungesa e politikave nxitëse të sistemeve në këtë sektor. Turisti i sotëm e jo ai “patriotik” me të cilin jemi mësuar keq kërkon argëtim totalisht të plotësuar. Ndoshta këtë duhet bërë nëpërmjet një rrjeti të konsoliduar profesionalizmi për akomodimin dhe mikpritjen e mysafirëve e jo përmes disa agjencive turistike që ndjekin turistët për t`i bindur ata se ku duhet të vendosen. Pra, gjithçka ka ndryshuar nga skema e viteve të kaluara, kjo duhet të jetë e qartë për ata që mendojnë të kalojnë pushimet në bregdet.
Shaban Peraj
Koha Javore