Rexhep (Haxhi) Lika, u lind në vitin 1940 në Brajshë, komuna e Ulqinit. Shkollën fillore e kreu në Katërkollë në vitin 1956, kur regjistrohet në medresenë “Alauddin” në Prishtinë, të cilën e kryen në vitin 1960. Si imam filloi të punojë në xhaminë e Husein-pashës në Plevla në vitin 1963 ku kreu detyrën e imamit, mual-limit dhe sekretarit deri në korrik të vitit 1965. Prej këtij viti e deri në janar të vitit 1987 punoi si imam, mual-lim dhe sekretar në xhaminë e Re në Tuz, ndërsa prej janarit të vitit 1987 si imam, mual-lim dhe sekretar në Xhaminë e Bregut në Ulqin. Nga korriku i vitit 1997 punon si imam në Xhaminë e Mezjahit, në Ulqin. Pranë Këshillit të Bashkësisë Islame Ulqin kryen edhe detyrën e kryeimamit. Është njohës i gjuhës arabe.
Si lindi dhe cila është rëndësia dhe vlera e agjërimit të këtij muaji të madhërueshëm për besimtarët myslimanë?
Muaji i Ramazanit është muaji më i madhërueshëm për myslimanët, për atë çka ka ndodhur dhe me atë çka janë të obliguar në këtë muaj. Siç dihet, shpallja përfundimtare e Allahut filloi ti shpallet Muhamedit a.s. mu në këtë muaj, shpallje e cila u plotësua brenda 23 vitesh. Agjërimi në këtë muaj për myslimanët është i obligueshëm. Siç thotë Zoti në Kuran sikur që e kanë pasur edhe popujt para nesh.
Qëllimi i agjërimit është devotshmëria. Për të mirat e agjërimit në Ramazan duhet të flitet gjatë. Ato janë edhe fizike, edhe shpirtërore, që në Islam nuk dallohen njëra nga tjetra. Ta analizojmë një agjerues, i cili është i etur dhe i uritur brenda katër mureve, ku nuk e sheh kush nga njerëzit dhe ai nuk e shtrin dorën të marrë as ujë e as ushqim, sepse ka vendosur të agjërojë në emër të Krijuesit, i cili din dhe sheh çdo gjë. Këtë gradë nuk mund ta arrijë askush përpos agjëruesit. Agjërimi ka edhe shumë të mira të tjera, të cilat i shijojnë ata që e kryejnë këtë obligim.
Të gjithë myslimanët besojnë në Kuran, librin e tyre të shenjtë. Megjithatë ata dallojnë ndërmjet tyre kur është fjala për mënyrën e zbatimit të rregullave kuranore. Cilat janë këto veçori apo karakteristika të cilat i dallojnë myslimanët nga njëri-tjetri? A ka dallime të tilla edhe ndër vetë besimtarët myslimanë shqiptarë dhe në çfarë konsistojnë këto dallime?
Ata që e njohin Islamin dhe myslimanët e dinë se të gjitha grupet në Islam nuk bëjnë më tepër se 12% të myslimanëve në Tokë. Sunnitët janë ata që në ritet fetare e ndjekin traditën e Muhamedit a.s. Brenda sunnitëve ka katër shkolla juridike të pranuara, të cilat dallohen në disa çështje joesenciale të riteve fetare që kanë të bëjnë me paraqitjen e jashtme – formën e riteve e jo me thelbin e tyre.
Sa u përket disa dukurive në mesin tonë, që manifestohen në kryerjen e riteve e që mund të duken se dallohen, për mua janë të kuptueshme, por problemi është që ata që e ushtrojnë këtë, nuk ma merr mendja se janë të njohur me arsyet përse e bëjnë këtë. Kjo është si pasojë e ardhjeve në Ballkan të disa organizatave bamirëse nga vendet arabe të cilët i udhëheqin jo dijetarë islamë, por njerëz të profileve tjera të cilët mund të jenë anëtarë të shkollave tjera juridike e jo asaj hanefite të cilës i përkasim ne.
Njëri ndër problemet më të mëdha të fesë islame ndër shqiptarë sipas vëzhguesve është niveli i predikuesve të fesë islame, respektivisht Kuranit. Kjo sipas tyre ka sjellur shpeshherë në keqinterpretimin e tij. Cili është niveli i përgatitjes së imamëve shqiptarë ndër ne?
Shqiptarët kanë qenë të mëshiruar nga Zoti xh.sh. të kenë dijetarë islamë me emër e zë, të pranuar nga bota islame, siç ishin Nasradin Albania në Damask, Sulejman ef. Gavoçi, të dy nga Shkodra, e mos ti përmendim të tjerët nga Kosova e Maqedonia. Siç dihet gjatë sundimit të sistemit monist në Ballkan janë bërë masakra ndaj dijetarëve islamë në trevat shiptare. Mirëpo, sot, falë Krijuesit, në aspektin kadrovik jemi në një nivel të lakmueshëm në krahasim me periudhën para 10 vitesh. Në Bashkësinë Islame të Ulqinit kemi 2 magjistra nga universitetet e njohura të Stambollit dhe Kajros dhe kemi edhe 6 studentë të tjerë në fakultetet e ndryshme teologjike islame në botë. Sa di unë, nuk ka pasur keqinterpretim të Kuranit. Kurani kuptohet sipas nivelit të atij që e lexon, e siç e dini nivelet janë të ndryshme. Nuk e di se nga i morën “vëzhguesit” këto të dhëna? Më intereson edhe këndi nga i cili i kanë vëzhguar.
Cilat janë problemet e Bashkësisë Islame të Ulqinit dhe cilat janë synimet e saj në të ardhmen?
Synimi i Bashkësisë Islame është që Islamin ta prezantojmë në mënyrë të drejtë dhe të denjë dhe që pjesëtarët e saj ta aplikojnë Islamin në jetën e përditshme.
Punët që na presin nuk mund të quhen probleme. Duhet të angazhohemi të gjithë, që:
– të kthehen pronat e Bashkësisë Islame të cilat u nacionalizuan gjatë periudhës moniste,
– xhamia e Kalasë të shërbejë si xhami e besimtarëve në Kala,
– të rindërtohet Xhamia e Marinerëve,
– të ndërtohet qendra islamike dhe xhamia qendrore (e cila është më se e nevojshme) në Plazhin e Madh,
– të rritet fondi për financimin e studentëve dhe nxënësve të medreseve,
– të ngritet vetëdija e besimtarëve që të kontribuojnë materialisht Bashkësinë,
– të afrohen intelektualët dhe ekspertët e të gjitha fushave që ti kon-
-tribuojnë Bashkësisë Islame në realizimin e synimeve të saj dhe në prezentimin e drejtë të Islamit,
– të ndihmojmë si Bashkësi ndërtimin e Medresesë në Milesh, e cila do të jetë fidanishte e kuadrove të ardhshme.
Problemet mund të lindin dhe ka vetëm kur është në pyetje mirëkuptimi nga organet përkatëse lokale dhe qendrore për realizimin e nevojave dhe synimeve të Bashkësisë Islame. Ju takon edhe ju mediave pjesa e ndihmës në prezentimin e drejtë dhe të denjë të aktiviteteve të Bashkësisë Islame.
Shqiptarët u përkasin tri feve: islame, ortodokse dhe katolike. Si e vlerësoni nivelin e tolerancës ndërfetare te shqiptarët?
Historia jonë kombëtare, falë Zotit, nuk ka shënuar mosmarrëveshje ndërfetare ndër ne, e jo më përleshje. Merita për këtë kanë të gjithë, por një meritë e veçantë u takon pjesëtarëve të fesë islame që përbëjnë shumicën e popullsisë shqiptare. Dëshira ime është që të gjithë të kujdesemi maksimalisht që ta ruajmë respektin reciprok fetar.
Jam i bindur se ka kaluar koha e konvertimit, por secili le të punojë në bashkësinë e vet fetare, ti udhëzojë besimtarët sipas mësimit të besimit të vet, e njëkohësisht ti udhëzojë ata në mirëmbajtjen e lidhjeve shoqërore me pjesëtarët e feve tjera. Në Kuranin famëlartë shkruan (El Mumtehine ): “Allahu nuk ju ndalon të bëni mirë dhe të bëni drejtësi me ata që nuk ju luftuan për shkak të fesë, e as nuk ju dëbuan prej shtëpive tuaja; Allahu i do ata që mbajnë drejtësinë”, kurse Muhamedi a.s. tha: “Unë, në ditën e Gjykimit, do të jem armiku i atij myslimani, i cili e trazon një jomysliman në qeverisjen islame!”

Jam munduar gjatë misionit tim si imam në Malësi e Ulqin, që të forcojmë mirëshkuarjen dhe nderimin reciprok në mes njerëzve të konfesioneve të ndryshme dhe gjatë tërë kohës kam hasur në njerëz të konfesioneve dhe shtresave sociale e intektuale të ndryshme që më kanë ndihmuar në këtë mision.

Ka nisur grumbullimi i mjeteve financiare për ndërtimin e xhamisë në Fushë të Ulqinit.

Xhamia do të jetë shumë funksionale: 1 mijë vende për falje, vend për mirëmbajtjen dhe pregaditjen e xhenazes (gasulhanja), mejtep, bibliotekë,sallë, kafiteri, vende për parkim etj.
Deri më tash është blerë trolli i xhamisë dhe është punuar projekti ideor.Lusim Allahun Fuqiplotë që çdo ndihmë tuajën ta radhisë në vepra të mira.

BASHKËSIJA ISLAME E ULQINIT

Xhirollogaria:510-12295-15

Informatat në tel/fax:
Tel/fax:+382 30 413-257
Mobil :+382 69 037-681
Mobil :+382 69 473-400