Qëllimi i organizimit të Shkollës Verore të Ekoturizmit sipas drejtuesit të projektit dhe drejtorit ekzekutiv të saj, prof. Dr. Mahir Hoti, është që studentët dhe pjesëmarrësit e tjerë të aftësohen për të ndërtuar dhe promovuar këtë lloj turizmi i cili mendohet të jetë tipik në rajonet veriore të Shqipërisë.
Rreth 20 pjesëmarrës, kryesisht studentë por edhe të tjerë, nga Shqipëria por edhe trevat e tjera shqiptare, po marrin pjesë në Shkollën Verore të Ekoturizmit të organizuar nga Departamenti i Gjeografisë dhe ai i Turizmit pranë Universitetit “Luigj Gurakuqi” në Shkodër. Shkolla ka filluar më 25 gusht dhe do të zgjasë deri të shtunën. Dy javët e para pjesëmarrësit i kanë kaluar në Shkodër, ndërsa tani ndodhen në Ulqin.
Qëllimi i organizimit të Shkollës Verore të Ekoturizmit sipas drejtorit të saj ekzekutiv, prof. Dr. Mahir Hoti, është që studentët dhe pjesëmarrësit e tjerë të aftësohen për të ndërtuar dhe promovuar këtë lloj turizmi i cili mendohet të jetë tipik në rajonet veriore të Shqipërisë.
Programi i Shkollës është ndërtuar si një ndërthurje e teorisë dhe praktikës.
“Pjesëmarrësit kanë marrë 40 leksione nga fusha e ekoturizmit, problemeve të përgjithshme të turizmit, menaxhimit turistik, planifikimit turistik, ofertës turistike, mjedisit dhe legjislacionit mjedisor, etj. Krahas leksioneve programi përmban ekskursione ditore në disa zona turistike tipike për këtë lloj turizmi si Razëm, Bogë, Shirokë, Zogaj dhe Liqenin e Biogradit”, thotë ai.

Dy ditët e fundit të Shkollës studentët do të punojnë në grupe ku secili grup do të ketë detyrë të hartojë projekte apo miniprojekte zhvillimi për një zonë të caktuar. Projektet e hartuara ata do tzi mbrojnë para një jurie.
Në fund të Shkollës, pjesëmarrësit do të pajisen me çertifikata.
Prof. Hoti është i kënaqur me interesimin e treguar për të marrë pjesë në këtë shkollë.
“Ajo që të bie në sy është pjesëmarrja e studentëve edhe nga Maqedonia dhe Mali i Zi”, thotë Hoti.
Sipas tij, organizimi i Shkollës Verore për ekoturizëm synohet të bëhet traditë “duke parë kërkesën në rritje për këtë lloj turizmi i cili është në harmoni me natyrën dhe ambientin”.
i.k.
Koha Javore