Projekt që begaton ofertën turistike të Ulqinit
Urban instituti po harton projektin e eko-infrastrukturës për deltën e bunës
Në mënyrë që projekti të jetë i qëndrueshëm parashikohet që objektet e planifikuara ekoturistike të integrohen me qendrën informative në Adë si dhe me kapacitetet e ardhshme turistike që do të ndërtohen në Adë dhe Plazhin e Madh.
Urban Instituti nga SHBA po harton projektin e eko-infrastrukturës për Deltën e Bunës, i cili përmes rrugëve për këmbësorë dhe çiklistë parashikon të lidhë Fraskanjelin, zonën e Shasit, me Adën dhe Plazhin e Madh, pastaj rrugët e tjera përgjatë Plazhit të Madh deri në Port Milenë dhe deri në Kalanë e Ulqinit.
Urban Instituti e realizon këtë projekt në bashkëpunim me Institutin për Hidroteknikë të Fakultetit të Ndërtimtarisë në Sarajevë, ndërsa ai financohet nga Banka Botërore, e cila pritet të financojë edhe vetë ndërtimin e ekoinfrastrukturës, në kuadër të Projektit të Zhvillimit të Qëndrueshëm të Turizmit në Mal të Zi, së bashku me Qeverinë e Malit të Zi dhe Komunën e Ulqinit.
Sipas përfaqësuesit të Urban Institutit, prof. Xhon Tejbor (John Tabor), ideja është që të ndërtohen rrugë për këmbësorë dhe çiklistë, kurse në një pjesë edhe për kuaj, të cilat do të ishin të integruara me njëra tjetrën.
Ai thotë se Ulqini ka potenciale të mëdha për zhvillimin e këtij lloj turizmi dhe se kjo do të begatonte ofertën e tij turistike.
“Sistemi i rrugëve të integruara për këmbësorë dhe çiklistë mund tzu mundësojë ekoturistëve lehtësi të mëdha për të parë llojet e ndryshme të zogjve shtegtarë, kafshëve dhe shpesëve të buta dhe të egra si dhe bimëve ekzotike”, thotë Tejbor.
Në mënyrë që projekti të jetë i qëndrueshëm parashikohet që objektet e planifikuara ekoturistike të integrohen me qendrën informative në Adë si dhe me kapacitetet e ardhshme turistike që do të ndërtohen në Adë dhe në Plazhin e Madh.
Në kuadër të promovimit të këtij projekti dhe të ekoturizmit në bregdetin e Ulqinit dhe deltën e Bunës, në Televizionin e Malit të Zi së shpejti do të fillojë transmetimi i serialit televiziv “Rrugët përmes bukurisë së virgjër”, i cili përbëhet nga disa pjesë.
Ismet Kallaba
Koha Javore