Ministria e bujqësisë, pylltarisë dhe ekonomisë ujore akordoi një shumë prej rreth 58 mijë eurosh për pronarët e ullinjve në ulqin
Ulqin – Ndarja e mjeteve financiare për pronarët e ullinjve në Ulqin nga ana e Ministrisë së Bujqësisë, Pylltarisë dhe Ekonomisë Ujore ka futur në sherr Komunën e Ulqinit dhe Shoqatën e Ullishtarëve të Ulqinit duke shkaktuar reagime të shumta dhe një luftë deklaratash ndërmjet përfaqësuesve të tyre.
Ministria e Bujqësisë, Pylltarisë dhe Ekonomisë Ujore ka ndarë rreth 58 mijë euro për 121 pronarë të ullinjve në Ulqin në emër të kompensimit për revitalizimin e ullinjve dhe krasitjen e trungjeve të ullinjve të vjetër.
Në një konferencë për shtyp, kryetari i Komunës së Ulqinit, Gëzim Hajdinaga, dhe këshilltari për bujqësi pranë kësaj komune, Gani Rexha, kanë bërë të njohur vendimin e Ministrisë së Bujqësisë, Pylltarisë dhe Ekonomisë Ujore dhe emrat e përfituesve të kësaj shume.
Shoqata e Ullishtarëve të Ulqinit ka reaguar përmes një konference për shtyp duke akuzuar kryetarin e Komunës së Ulqinit dhe këshilltarin për bujqësi pranë kësaj komune se po përvetësojnë në mënyrë të rrejshme meritat e dikujt tjetër dhe se po e mashtrojnë opinionin për shkak të përfitimit të pikëve politike.
“As z. Hajdinaga e as referenti i tij për Bujqësi, z. Gani Rexha, nuk kanë luajtur as me gisht për realizimin e procesit të pagesës ullishtarëve. Për këtë kanë merita Ministria e Bujqësisë me z. Simoviq në krye dhe shoqatat e ullishtarëve të Ulqinit, Tivarit dhe Bokës”, ka thënë Xhaudet Cakuli, kryetar i Shoqatës së Ullishtarëve të Ulqinit.
Kritikave të Cakulit i është përgjigjur këshilltari për bujqësi pranë Komunës së Ulqinit, Gani Rexha.
“Nuk ka rëndësi se kush e bëri apo ka meritë për vjeljen e mjeteve për revitalizimin – krasitjen e ullinjve për ullishtarët e Ulqinit, por rëndësi ka që ato janë shfrytëzuar”, ka thënë Rexha.
Ai e ka ftuar Cakulin që t`i lënë prapa mosmarrëveshjet dhe të merren me hartimin e planeve të zhvillimit të ullishtarisë, që përbën prioritet për komunat bregdetare në bazë të Strategjisë së Zhvillimit të Bujqësisë në Mal të Zi.
“Në të mirën e zhvillimit të ullishtarisë dhe bujqësisë së Ulqinit ftoj për bashkëpunim shoqatat e ullishtarëve dhe të gjitha shoqatat e tjera të kësaj lëmie. Dyert e pushtetit lokal kanë qenë dhe do të jenë gjithmonë të hapura për shoqata dhe njerëz të ideve dhe mendimeve përparimtare që kontribuojnë në zhvillimin e mirëfilltë”, ka thënë Rexha.
I.Kallaba
Koha Javore