Kryetari i komunës së Ulqinit,Gëzim Hajdinaga,vlerëson punën dyvjeçare të pushtetit ekzekutiv në Ulqin
Premtimet do ti realizojmë një për një
Ulqin – Kryetari i Komunës së Ulqinit, Gëzim Hajdinaga, vlerësoi pozitivisht punën e pushtetit ekzekutiv gjatë dy viteve që kur ai ka ardhur në krye të Komunës së Ulqinit.
“Dy vjet më parë ne përcaktuam objektivat themelorë dhe fushat e prioriteteve e sot me kënaqësi mund të konstatojmë se në këto fusha ka një bilanc pozitiv”, tha ai në një konferencë për shtyp të organizuar të mërkurën e kaluar, në dyvjetorin e mbajtjes së rrethit të dytë zgjedhor për kryetar të komunës.
Ai përmendi një sërë të arriturash gjatë kësaj periudhe duke veçuar rritjen e buxhetit të Komunës së Ulqinit.
“Për vitin 2007 ne planifikuam buxhetin në masën 3 960 000 euro e me angazhimin tonë ia dolëm mbanë që të njëjtin ta realizojmë në tërësi dhe për të parën herë pas shumë vitesh të bëhet ribalanci pozitiv. Ai u realizua në masën 105.21% krahasuar me planin”, tha Hajdinaga.
Kryetari i Komunës së Ulqinit tha se realizimi i buxhetit të këtij viti do të jetë më i lartë në krahasim me vitin e kaluar.
“Buxheti i këtij viti është planifikuar në masën 11 036 000 euro. Krahasuar me situatën kur ne erdhëm në pushtet, buxheti i këtij viti është 435% më i lartë”, tha ai.
Hajdinaga theksoi se është rritur edhe shuma e investimeve.
Ai po ashtu potencoi edhe një varg aktivitetesh tjera si hartimi i Planit Gjeneral Urbanistik, i cili pret pëlqimin nga Ministria për Zhvillim Ekonomik, ndryshimet dhe plotësimet e një numri të planeve detaje urbanistike, etj.
Hajdinaga theksoi se vëmendje e veçantë i është kushtuar turizmit dhe bujqësisë si degë komplementare e turizmit.
Kryetari Hajdinaga nënvizoi edhe organizimin e një sërë veprimtarish kulturore.
“Edhe këtë vit me mjaft sukses organizuam Panairin e Librit, Kalimerën Poetike, Fashion Festival-in dhe edicionin e 21-të të Festivalit “Skena Verore”. Këtë vit u ngjitën në skenën tonë artistë dhe të ftuar nga qendra të ndryshme. Takimi me arbëreshët e Italisë ishte mbresëlënës”, tha ai.
Hajdinaga përmendi bashkëpunimin e mirë me shumë komuna të tjera, me disa prej të cilave tashmë janë nënshkruar marrëveshje bashkëpunimi apo binjakëzimi.
“Komuna e Ulqinit ka nënshkruar Protokoll Marrëveshjen për bashkëpunim me Komunën e Stanfordit në SHBA, distriktin 23 të Vjenës, komunën e Barletës e në përgatitje e
sipër janë marrëveshjet me komunën e Strugës, Llarinos, Sarajevës dhe Dubrovnikut. Ulqini është tashmë pjesë e rrjetit të komunave Eurodistrikti Adriatiku Jugor”, tha ai.
Kryetari i Komunës së Ulqinit tha se fundi i këtij viti dhe viti 2009 do të shënojë një sërë investimesh.
Ai përsëriti se ai dhe stafi i tij do të realizojnë gjatë mandatit të tij të gjitha premtimet e dhëna.
“Ju siguroj edhe një herë që unë dhe stafi që drejtoi misionin që kemi marrë përsipër do ta kryejmë me përpikmëri me angazhim dhe përkushtim të palëkundur dhe se fjalët e mia do tzi shndërroj një për një në fjalë të mbajtura dhe se gjatë mandatit tonë në tërësi do të realizojmë projektet e nominuara dhe do të justifikojmë besimin e dhënë nga ju”, përfundoi Hajdinaga.
i.k
Koha Javore