Rrezikohet sezoni i ardhshëm turistik
Ulqin – Forca e Re Demokratike kritikon Komunën e Ulqinit duke vlerësuar se mosfunksionimi i Organizatës Turistike Lokale, pagesa aforfe e taksës së qëndrimit, shpenzimi në mënyrë të paligjshme i këtyre parave dhe mosvjelja e të ardhurave nga burimet e tjera ligjore vënë në pikëpyetje përgatitjet për sezonin e ardhshëm turistik në Ulqin.
Kjo parti madje thekson se qytetarët janë mashtruar nga Komuna e Ulqinit se gjoja Organizata Turistike e Ulqinit është themeluar.
“Në Panairin e Turizmit në Budvë, të mbajtur në shkurt, madje ka qenë e shkruar Organizata Turistike e Ulqinit, me qëllim që të fitohet përshtypja se ajo vërtet është themeluar dhe se funksionon”, thuhet në deklaratën për shtyp të Forcës.
Sipas kësaj partie, sezoni i sivjetshëm i dobët turistik do të ketë pasoja afatgjate dhe qytetarët nuk do të mund të përballen me rënien e mëtejshme të të ardhurave nga turizmi.
“Të gjithë synojmë zhvillimin e turizmit elitar, por ai kërkon qasje tjetër dhe serioze. Me siguri që nuk do të mund të zhvillojmë turizëm elitar me kapacitetet turistike ekzistuese, nivelin ekzistues të pastërtisë, rrugëve dhe sistemit të kanalizimit”, vlerësojnë në Forcën e Re Demokratike.
Nga kjo parti përkujtojnë se në bazë të Ligjit mbi organizatat turistike, të nxjerrë në vitin 2004, çdo komunë është e detyruar të themelojë organizatën turistike lokale.
“Ulqini është komuna e vetme në Mal të Zi e cila nuk e ka themeluar Organizatën Turistike Lokale me ç`gjë u është shkaktuar dëm i madh qytetarëve, Komunës dhe shtetit”, thuhet në deklaratën për shtyp.
Sipas Forcës, arsyet se pse nuk është themeluar Organizata Turistike nuk janë bërë të njohura, por rreth tyre vetëm mund të supozohet.
“Vendimi për themelimin e Organizatës Turistike Lokale është miratuar në seancën e Kuvendit të Komunës në nëntor të vitit të kaluar, por implementimi i tij nuk ka filluar ende. Me vendim janë përcaktuar edhe të ardhurat ligjore të cilat i përkasin Organizatës Turistike e të cilat nuk vjelen, ndërsa Komuna në këtë mënyrë humb një shumë të konsiderueshme të të ardhurave. Nga të gjitha burimet e parashikuara, vilet vetëm taksa e qëndrimit, por edhe ajo në mënyrë të paligjshme, ndërsa të ardhurat shpenzohen në mënyrë të paligjshme, gjë që e ka konstatuar edhe revizori republikan”, thuhet në deklaratën për shtyp.
Forca thekson se me këtë mënyrë të punës, pushteti lokal do t`i sjellë qytetarët në situatë tejet të palakmueshme, andaj i bëjnë thirrje organeve kompetente republikane që ta urdhërojnë kryetarin e Komunës së Ulqinit që të themelojë Organizatën Turistike, sepse kjo komunë mund të jetë përsëri qytet bartës i turizmit në Mal të Zi.
Reagimi i Forcës së Re Demokratike ka ardhur vetëm një ditë pasi që kryetari i Komunës së Ulqinit mbajti një konferencë për shtyp me rastin e dyvjetorit të ardhjes së tij në krye të Komunës së Ulqinit, ku ai proklamoi rezultatet e punës së tij gjatë kësaj periudhe të cilat i vlerësoi si tepër të suksesshme.
Burimi / Kohapress