Është vetëm 15 vjeç dhe nuk ka frikë të marrë iniciativa të guximshme në jetë, sidomos kur bëhet fjalë për modën. Kështu ka nisur rrugën drejt ëndrrës për të shkelur pasarelat e modës në botë, Dorela Hysa. Dhe ka qenë me fat, sepse destinacioni është Amerika. Bëhet fjalë për një ofertë që sapo i ka trokitur në derë, dhe që do t’i ndryshojë jetën. Dorela Hysa fituesja e “Ford Super Model of the World Albania 2008”, që u organizua në Tiranë më 29 tetor 2008, ka vendosur të lërë Shqipërinë në qershor për t’u vendosur në Nju Jork, siç ka pohuar vetë për “Panorama Plus”.

Vetëm tre muaj pasi është shpallur fituese e këtij evenimenti, i katërti i organizuar nga “Top Channel” në kujdesin e fotografit Fadil Berisha, ka marrë ofertën nga një agjenci prestigjioze në Nju Jork, kontratën me të cilën do ta lidhë në qershor. Ende nuk bëhet publike emri i agjencisë, por Dorela e ka vendosur që të largohet për të nisur një jetë të re. Vajza bjonde, me sytë e mëdhenj jeshil, shumë çapkëne, me karakteristikat e tipareve të fytyrës në modë sot për preferencat e stilistëve, shpreson të ketë sukses dhe t’i ecë mbarë. Ajo aktualisht është në vitin e dytë të shkollës së mesme “Petro Nini Luarasi” në Tiranë, por pohon se pas kurorës së supermodeles, jeta i ka ndryshuar.

Që kur u shpall modelja më e mirë, ka pasur oferta të shumta kryesisht nga agjenci reklamash, kështu që i duhet të programojë kohën më mirë. Kur fitoi çminin, ajo u shfaq shumë e impresionuar se nuk e priste, ndërsa kishte sfiluar nën direktivat e koreografes së edicionit të sivjetshëm, Zana Krasniqi, fituesja e parë e po këtij titulli për Shqipërinë në vitin 2005. Dorela u përzgjodh më e mira mes 15 vajzave konkurrente, këto të zgjedhura nga 150 vajza, që aplikuan për të marrë pjesë në konkursin e televizionit “Top Channel”.

PanoramaPlus