Intervistë me kryetarin e Ulqinit Gëzim Hajdinaga
Ulqini mbetet destinacioni më i “lirë”
Kreu i komunës së Ulqinit, tregon se hapësira që ka në kompetencë dhe që menaxhohet nga shqiptarët, ka bërë përgatitjet e duhura që kjo sezon të jetë më e mirë se ato të kaluarat.

Numri një i Ulqinit, Gëzim Hadinaga, thotë se Ulqini do të mbetet i konkurrueshëm edhe me çmime, pasi mbetet vendi më i “lirë” në rajon dhe sivjet kanë ulur çmimet edhe për 20 për qind. Por, ai thotë se përveç çmimeve të lira, Ulqini, ofron bukurinë e ujërave, dhe madhështinë e traditës. Ai po ashtu thotë se ofrohet edhe argëtimi tanimë tradicional. Ndërs, sa i përket dokumenteve, tanimë Kosova është shtet i njohur nga Mali i Zi dhe se policia është udhëzuar që të trajtojë me lehtësira turistët nga Kosova. “Ulqini ka kapacitete shumë të mëdha për tu vendosur turistët, sidomos në sektorin privat. Tash ka kushte më të mira ku njerëzit po shkojnë drejtë standardeve më të mira që i kërkojnë edhe turistët. Ulqini ofron kushte për të gjitha shtresat dhe çmimet do të variojnë sipas kërkesave”, thotë Hadinaga, i cili ndodhet në Kosovë për të promovuar turizmin në Ulqin, në panairin për turizmin, ku po marrin pjesë edhe Shqipëria dhe po ashtu edhe Maqedonia.

“Bota sot”: Cilat janë kushtet që ofroni këtë sezon për turistët nga Kosova?

Gëzim Hajdinaga: Normalisht se Ulqini duke pasur një traditë shumë vjeçare për turizmin, edhe këtë vit kemi bërë përgatitjet e duhura për fillimin e sezonës turistike. Ka infrastrukturë më të mirë, furnizim me ujë e rrymë, pastërti më të mirë. Përveç organeve komunale edhe lokalet hoteliere kanë bërë investime të shumta me qëllim që të ketë kushte më të mira për turistët. Si komunë dhe kryetar i saj, kemi marr hapat shtesë që oferta e jonë për sezonën turistike 2009 të jetë më e mirë se vitet e tjera. Edhe pse mbesim si destinacioni më i lirë në rajon, kemi zvogëluar çmimet për 20 për qind dhe nuk ka ku të bien më shumë. Duke parë se një ndër çështjet kryesore të ardhjes së turistëve është edhe infrastruktura rrugore e cila tek ne është mjaft e mirë, ku qeveria dhe komuna e Ulqinit janë duke bërë asfaltimin, mirëmbajtjen e rrugëve në mënyrë të duhur. Edhe rruga Morinë-Durrës, e cila pritet të lëshohet së shpejti do të jetë pjesë e infrastrukturës së ardhjes së turistëve nga Kosova në Ulqin. Ne jemi të përgatitur për të gjitha, kemi rrugë më të mira, drita, ujë e pastërti. Qyteti i Ulqinit, është një perlë e vërtetë në bregdetin e Mesdheut. Sot Ulqini paraqet destinacionin turistik më atraktiv dhe më të vizituar. Turistë nga e gjithë bota vizitojnë qytetin tonë, mahniten me bukuritë tona, atraksionet, manifestimet, plazhet, liqenet, lumenjtë, me monumentet kulturo-historike, me banorët dhe mënyrën gjenerale, me atmosferën freskuese për shpirtin.

Bota sot: Me çfarë dokumentesh mund të kalojnë kufijtë e Malit të Zi qytetarët nga Kosova dhe a do të eliminohen pritjet e gjata në pikat kufitare?

Gëzim Hajdinaga: Të gjitha dokumentet që kanë qytetarët e Kosovës do të jenë valide sikur ato të Republikës së Kosovës, po ashtu edhe ato të UNMIK-ut dhe tjera. Është rekomanduar nga qeveria që në pikat kufitare ku hyjnë qytetarët nga Kosova, në kohën e fluksit të madh në korrik e gusht, të ketë punonjës në numër më të madh që të kryejnë procedurat e kontrollimeve në mënyrë sa më të shpejt. E dimë se qytetarët nevrikosen me pritjet e gjata dhe kjo gjë është negative. Besojmë se gjithçka do të shkoj mirë dhe nuk do të ketë pritje të gjata në pikë kalimet kufitare. Siguria është në nivel të kënaqshëm dhe Mali i Zi është një shtet stabil. Tashmë kemi një klimë shumë të mirë sa i përket sigurisë dhe nuk mund të flitet fare për pasiguri.

Bota sot: Vitin që shkoi keni pasur një zbehje të numrit të turistëve nga Kosova për shkak të mos njohjes së shtetit nga Mali i Zi, tashmë kur keni njohur Kosovën prisni përsëri fluks të madh turistësh?

Gëzim Hajdinaga: Edhe vitin e kaluar ka pasur një numër të madh të turistëve nga Kosova në Ulqin edhe pse Mali i Zi nuk e kishte njohur Kosovën. Tashmë shteti jonë e ka njohur vendin tuaj dhe një kontribut të madh për njohje e kanë dhënë qytetarët shqiptarë që jetojnë në Malin e Zi dhe Ulqini në veçantë. Atëherë besoj se pos vlerave që i natyra i ka dhënë Ulqinit, mikë pritjes dhe traditës, turistët nga Kosova sikur çdo herë do të pushojnë në plazhin e bukur të Ulqinit. Ata edhe më herët kanë pasur mundësi të pushojnë në shtete tjera, por kanë ardhur te ne për shumë gjëra që si kanë askund tjetër. Qeveria e Malit të Zi ka njohur Kosovën në kohën e duhur edhe përkundër kërcënimeve të shumta dhe pres nga qytetarët e Kosovës që sivjet të jenë edhe më shumë në vendin tonë dhe të tyrin.

Bota sot: Cilat janë kapacitet që ofroni këtë verë për turistët dhe aktivitetet kulturore?

Gëzim Hajdinaga: Ulqini ka kapacitete shumë të mëdha për tu vendosur turistët, sidomos në sektorin privat. Tash ka kushte më të mira ku njerëzit po shkojnë drejtë standardeve më të mira që i kërkojnë edhe turistët. Ulqini ofron kushte për të gjitha shtresat dhe çmimet do të variojnë sipas kërkesave. Përveç detit dhe diellit, turistët do të kenë edhe mundësinë e argëtimit, ku si çdo vjet do të ketë këngëtarë, artistë e njerëz kulture nga Kosova ku shumë aktivitete janë bërë tradicionale. Edhe presidenti i Shqipërisë Bamir Topi, do të jetë i pranishëm në ceremoninë e hapjes së panairit të librit. Një ngjarje tjetër është edhe muaji i kulturës që mbahet në Kalanë e Ulqinit, ku edhe aty pjesën dominante e kanë artistët nga Kosova. Plazhet e bukura, ullinjtë mijëvjeçarë, fushat pjellore, klima e butë, ulqinakët e shoqërueshëm dhe gjithmonë të buzëqeshur, kanë ngjallë dhe krijuar tek të gjithë motivacionin për ta dashur qytetin tonë.

Bota sot: Cili është mesazhi i juaj për qytetarët e Kosovës që të jenë në Ulqin?

Gëzim Hajdinaga: Si njeriu i parë i komunës dhe përfaqësues i të gjithë qytetarëve të Ulqinit, dëshiroj që t’i siguroj qytetarët e Kosovës se në qytetin tonë gjithmonë do të jenë të mirëseardhur, se do të kënaqen në pushime dhe se përsëri do të dëshironi që të ktheheni në Ulqinin tonë dhe tuajin.

Intervistoi: Besim Toska
Bota Sot