Duke pritur verën; Shpresa të vogla për optimizëm
Vlerësimet dhe analizat nga tregjet emetuese, rezervimet e deritashme, si dhe ajo që mund ta shohë vetë, na bindin se nuk duhet të presim rezultate të mira, madje as në vlugun e stinës. Këtë luksozitet mund tzia lejojnë vetes vetëm optimistët kujdestar nga radhët e pushtetit në të gjitha nivelet.
Siç duket, kjo stinë do të kalojë me moton “Rrëmbe atë që mundesh”. Përndryshe, të tilla kanë qenë të gjitha stinët brenda 20 viteve të fundit, kështu që punëtorët e turizmit dhe qiradhënësit privatë, do ta durojnë më lehtë trajnimin e nervave.
As kriza e madhe ekonomike botërore, etja jonë për fitim, për rritje ekonomike dhe punësim nuk ka mundur tza detyrojë elitën tonë politike që të merret me turizëm si me një industri serioze. Po si ta bënin këtë, kur kanë njohuri fare modeste për këtë.
Këtë kemi mundur ta dëgjojmë këto ditë edhe në një tubim prestigjioz që është mbajtur në Qytetin e Vjetër të Ulqinit, në të cilin morën pjesë zyrtarë dhe sipërmarrës gjermanë dhe organizatorë të udhëtimeve turistike. Ndoshta më pesimisti ishte konstatimi i ambasadorit të Gjermanisë në Malin e Zi, Peter Plate, i cili qëndron shpesh në Ulqin dhe e do këtë qytet, se rrugët janë akoma përplot gropa dhe se plehërat hedhen dhe grumbullohen kudo.
“Në krahasim me vendet e tjera, çmimet janë tepër të larta në krahasim me ofertën. Plazhet janë ende të zbrazëta dhe kjo është shenjë ugurzezë. Këtë verë turizmin nuk e presin ditë me diell”, kanë shkruar gazetarët gjermanë të cilët qëndruan këtu para disa kohe.
Të gjithë ata që ndjekin turizmin dhe i njohin ecuritë në tregun e brendshëm, e dinë se kriza është çështje dytësore në rrethanat apo vështirësitë turistike të Ulqinit. Kjo për shkak se problemet tona kanë qenë të pranishme edhe pa recesion: çmimet e larta për një ofertë të dobët, hotelet e pameremetuara dhe mungesa gjithnjë më e theksuar e mirësjelljes.
Pasi që në këtë stinë turistike shumica e klientëve do të vendosin në momentin e fundit se ku të shkojnë për pushime, është mjaft e rëndësishme lidhja e trafikut me vendet emetuese. Edhe në këtë aspekt, për dallim nga konkurrentët tanë, shanset tona janë të dobëta.
Kjo vlen sidomos për Shqipërinë. Deri në fillim të stinës kryesore do të hapet superstrada Durrës – Prishtinë, nëpër të cilën kosovarët do të munden të arrijnë për jo më shumë se dy orë e gjysmë nga Deti Jon deri në Detin Adriatik. (Kjo rrugë do të ndryshojë edhe gjeostrategjinë e Ballkanit). Gjithashtu duhet ditur se qytetarët e Kosovës kanë blerë shumë pasuri të patundshme në Shqipëri, se Durrësi çdo fundjavë është përplot kosovarë, se Shëngjini praktikisht është bërë port kosovar në Adriatik, ku të gjitha këto flasin se shumë më tepër klientë sesa vitin e kaluar nga ky treg tradicional në këtë sezon do të kalojnë pushimet verore në Shqipëri.
Gjithashtu e dimë se të gjitha qytetet në veri të Nishit dhe Beogradit (për shkak të infrastrukturës së mirë rrugore) në aspektin e trafikut janë më afër bregdetit kroat sesa atij malazias, kështu që krahas faktorëve të tjerë nuk befasojnë rezultatet e publikuara para do kohe të një ankete sipas të cilave vetëm tre përqind të qytetarëve të Serbisë pushimet verore do ti kalojnë në Mal të Zi!? Një numër i konsiderueshëm i klientëve do të mund të qëndronte gjatë kësaj stine në Ulqin nga Bosnja dhe Hercegovina, edhe pse këtij tregu i kushtohet fare pak kujdes. Sepse, boshnjakët janë të mërzitur me Kroacinë. Këtu siç thonë ata, ndihen në mënyrë më komode dhe të relaksuar.
Është iluzion të mendohet për një numër më të madh të klientëve nga tregjet perëndimore. Ata do të jenë vetëm në hotelin “Otrant – Iberostar”, në Plazhin e Madh (e në të cilin ulqinakët as që mund të pijnë një pije!), kurse në Adë nudistët tradicionalë.
Sido që të jetë, ka fare pak arsye për optimizëm. Mirëpo, kjo krizë ndoshta do ta ndihmojë turizmin e Ulqinit, të cilët pavarësisht nga rezultatet e stinës, më në fund do tzi përcaktojnë qëllimet e synuara dhe si tzi realizojnë ato.
E për ta arritur këtë, për të mundur që të vendosin për fatin e vet, për tzu lënë diçka edhe gjeneratave të ardhshme, duhet të hapet urgjentisht debati i gjerë në parlamentin komunal lidhur me të gjithë këta tenderë të panumërt dhe të dëmshëm.
Mustafa Canka
Koha Javore