Podgoricë, 7 mars – Edhe pse autoritetet e Podgoricës dhe të Prishtinës, duket se nuk kanë ndonjë nguti për të shkëmbyer ambasadorët, subjektet politike shqiptare në Malin e Zi, e shohin se këtë akt duhet kryer sa më parë, sepse, pikërisht shqiptarët kanë shumë probleme të pazgjidhura, të nënshtetësisë, stazhit të punës në kohën e shtetit të përbashkët, çështja e pronave e shumë tjera, raporton KosovaLive.
Podgorica zyrtare tash dy vjet e më shumë deklaron se “shkëmbimi i ambasadorëve me Prishtinën kërkon një kohë…?”
Podgorica zyrtare, në të vërtetë kryetari malazias, Filip Vujanoviq ministri i Jashtëm, Milan Rocen edhe ditë më parë po ashtu ka përsëritur se “deri atëherë do të zgjidhet statusi ligjor dhe pozita e komunitetit malazias, në Kosovë, gjë për të cilën posaçërisht është duke insistuar kryetari i Malit të Zi, Filip Vujanoviq.
Edhe kryeministri i Republikës së Kosovës, Hashim Thaçi lidhur me mardhëniet diplomatike me Malin e Zi më herët ka thënë se “procesi i shkëmbimit të ambasadorëve do të nisë dhe besoj që kjo të bëhet së shpejti”, ka deklaruar Thaçi. Ai ka shtuar se vendosja e marrëdhënieve diplomatike ndërmjet Malit të Zi dhe Kosovës është një lajm i mirë, jo vetëm për dy vendet, por edhe për tërë rajonin.
“Për perspektivën tonë të përbashkët të integrimit në strukturat euroatlantike”, ka pas deklaruar shefi i qeverisë kosovare.
Duke komentuar deklaratën e presidentit malazez Filip Vujanoviq “ se nuk do të nënshkruajë letrat kredenciale, derisa pakica malazeze të mos njihet në Kosovë, Thaçi ka thënë se shteti i pavarur dhe sovran i Kosovës është ndërtuar mbi parimet qytetare dhe multietnike.
Ndërkohë, avokati nga Prishtina, Azem Vllasi, ditën e diel ka deklaruar për të përditshmen opozitare “Dan” të Podgoricës, se “Mali i Zi nuk ka ndonjë interes të posaçëm që të nxitojë shkëmbimin e ambasadorëve me Kosovën, edhe për momentin askush nuk di se kur do të ndodh kjo.
“Edhe njëra edhe pala tjetër kanë thënë se do të ndodhë kjo një ditë “,- është shprehur Vllasi.
Ndërkaq, Forca e Re Demokratike, parti e rëndësishme parlamentare shqiptare në Mal të Zi edhe pse kanë kaluar më shumë se dy vjet që Podgorica e ka njohur Republikën e Kosovës, në fillim të vitit të kaluar u vendosën marrëdhëniet diplomatike, por as sot e kësaj dite nuk janë emëruar as vendosur ambasadorët në Prishtinë, përkatësisht në Podgoricë.
“Secila qeveri, do të duhet të qëndrojë fuqishëm pas vendimit të vet, por dy vjet e më shumë zvarritje janë shumë për kalkulime,- shprehet deputeti i Forcës, nënkryetar i këtij subjekti politik parlamentar shqiptar.
Ish- punëtorët e Kosovës, shtetas të Malit të Zi thonë se kanë probleme jashtëzakonisht të pazgjidhura për kohën e punës së kaluar në Kosovë deri në fillim të viteve 90- të, kur edhe ata, sikur punëtorët tjerë të Kosovës, u nxorën me dhunë nga regjimi i Milosheviqit.

Profesori i artit figurativ Mehmet Aloja thotë se më shumë se 17 vjet kam punuar në Gjimnazin e Lipjanit. Ku të kërkoj të drejtat e mia që të marrë edhe për ato vite pune pensionin.
Mehmeti thotë se në Ulqin ka shumë veta që kërkojnë realizimin e të drejtave të tyre.
Në Podgoricë ende Kosova nuk ka ambasador, as Mali i Zi në Prishtinë. Ky është një shqetësim shumë i madh sepse nuk kemi asnjë adresë për të kërkuar zgjidhjen e këtyre probleme ekzistenciale që kemi.
Të kësaj kategorie ka shumë ish- punëtorë të Kosovës, shtetas të Malit të Zi. Vrapojnë nëpër qytete të ndryshme të Serbisë, duke dhënë edhe para të shumta, por “nga këto mashtrime kanë mbetur duarthatë!”

KOHA NET