Të buzëqeshur dhe të bukur si asnjëherë më parë festuan natën e gjysmëmaturës + Foto
Është pikërisht muaji maj kur euforia e gjysmëmaturës dhe maturës dëgjohet kudo. Shetitorja në Plazhin e Vogël të Ulqinit më 30 maj të këtij viti ishte e mbushur plot me miq dhe familjar që dolën për t’ju dhënë urimet e tyre semimaturantëve të Shkollës fillore “ Marshali Tito”, të cilët festuan ditën më të bukur të shkollimit tetëvjeçar – natën e maturës së vogël . Të veshur për bukuri si asnjëherë më parë parakaluan plot hir përgjatë shetitores së Ulqinit në Ranë. Prej aty semimaturantët shkuan në restorantin “ Primavera”, ku të buzëqeshur në çifte hynë brenda nën përcjelljen e kamerave dhe apatarave fotografikë. Ata natën e tyre e festuan deri në ora një pasmesnate ashtu sikurse është bërë traditë tashmë me muzikë, këngë, valle, përqafime dhe me aktivitete të tjera të organizuara e spontane që e begatuan atmosferën festive.
Pjesë e këtij solemniteti të organizuar bukur e me shije përveç bukurisë adoleshente nuk mungoi as humori e satira e nxënësve që kishin përgatitur për kujdestarët e tyre të dashur, Muho Ceka, Mefit Tela, Medina Rejzi, e të tjerë, për t’u treguar në ndarje se tani janë të aftë të përshkruajnë me humor e sarkazëm sjelljet dhe veprimet e tyre gjatë shoqërimit katërvjeçar. Nuk munguan as dhuratat për secilin kujdestar të klasëve nga ana e nxënësve. As kujdestarët e klasëve nuk ndejtën indiferentë, por me dashuri prindërore bashkë me drejtorin e shkollës Martin Zadrima përshëndetën nxënësit e tyre. I përgëzuan ata për sjellje shëmbullore dhe suksesin e arritur, duke u shprehur se i gjithë kolektivi i shkollës mburren dhe ndjehen krenar për këtë gjeneratë, e cila në analet e shkollës do të mbetet e shënuar se ka dhënë 16 nxënës me diplomën “ Lluça” ( Pishtari). Ata u dëshiruan nxënësve rrugëtim të mbarë në jetë, shëndet dhe suksese në mësime.
Gjysmëmaturantët pranuan me kënaqësi urimet dhe dëshirat më të sinqerta të mësimdhënsve dhe prindërve për suksese në jetë dhe në shkollimin e mëtutjeshëm.
Të gjithë prindërit u kënaqën që pas një periudhe tetëvjeçare, fëmijët e tyre përmbyllën një cikël arsimimi, i cili do ju hap rrugën për të ecur edhe më tutje përpara. Pritshmëritë e tyre janë se këta nxënës me dijen që kanë fituar dhe me njohurit e fituara në shkollë do të dinë të ecin drejt sukseseve në të ardhmen.
Nxënësja Emina Nimanbegoviq na tha se shkollimin fillor veçmas do ta mbajë mend për atë se ka njoftuar shumë shokë dhe shoqe të mira dhe se i vjen keq se do të ndahet nga disa prej tyre. Ajo shprehet se nata e maturës së vogël do të jetë e paharrueshme për të dhe shton se shkollimin e mesëm do ta vijojë në gjimnazin e Ulqinit.
Për dallim nga ajo Amell Ceni shkollimin e mesëm do ta vazhdojë në qytetin e Shkodrës. Dëshira e tij është të regjistrojë Kolegjin turk ose medrezën. Ai ndjehet shumë i kënaqur me atmosferën gjatë natës së gjysmëmaturës dhe flet me emocion për ditët shkollore.
Edhe Leudrita Mustafa ndihet e entuziasmuar pas natës së tyre. “ Jam e gëzuar që së bashku me shokët dhe shoqet e mia mbyllëm një pjesë të rëndësishme të jetës. Ia kemi kaluar shumë bukur. Kemi krijuar shoqëri të mirë. Dhe pas tetë vitesh shoqërim e argëtim është e vështirë të harrosh kujtimet më të bukura. Në kujtesën time sidomos do të mbeten shoqet, mësimdhënësit dhe notat e mira. “thotë Mustafa e cila do të regjistrojë gjimnazin në Ulqin.
Gjysmëmaturantët e kësaj shkollë pas argëtimit në restorantin “ Primavera” vazhduan të shoqërohen deri në orët e vona të pasmenatës në diskotekën “ Studio 55”. Në shoqërim të muzikës u ndanë me përqafime duke i dhënë fjalën njëri-tjetrit se përsëri do të takohen së bashku, në mënyrë që edhe një herë të shpalosin përshtypjet nga shkolla dhe nata e semimaturës.
Foto ARS studio