Ambasadori i BE-së Drobniç viziton Ulqinin
Ambasadori Drobniç vizitoi komunën e Ulqinit
Me datën 9 korrik shefi i delegacionit të BE në Mal të Zi Mitja Drobniç ishte në Ulqin në një vizitë njëditore. Qellimi i kësaj vizite është informimi i publikut për proceset e integrimeve Europiane si dhe pozita e Malit të Zi në këtë proces. Fillimisht z. Drobniç është takuar me Kryetarin Cungu dhe bashkëpunëtorët e tij dhe ka biseduar lidhur me rolin e administratave lokale në këtë proces. Në bisedën e përbashkët, Cungu ka konfirmuar vendosmërinë e Komunës së Ulqinit për integrimet Europiane dhe e ka njoftuar me aktivitetet që janë duke u ndërmarrë në atë drejtim.
Komuna e Ulqinit vitin e kaluar ka themeluar zyrën për projekte ndërkombëtare e cila është njëra ndër më të suksesshmet në Mal të Zi dhe përmes projekteve të ndryshme kjo zyrë ka pasur sukses të tërheq rreth 1 milion e 300 mijë Euro, tha Cungu. Ai ka theksuar që krahas asaj që Komuna e Ulqinit në 20 vitet e fundit po përjeton një mos zhvillim të madh dhe se ka pësuar humbje për sa i përket rëndësisë si destinacion turistik, ky qytet gjithmonë ka qenë i hapur ndaj Europës dhe botës dhe se ky qëndrim është edhe pjesë e traditës së këtij qyteti. Ai gjithashtu ka prezantuar një sërë problemesh të cilët janë shumë të rëndësishëm për zhvillimin e Ulqinit dhe për të cilët delegacioni i BE do të mund të ofronte ndihmën e vet. Zgjerimi i kalimit kufitar në Sukubinë i cili është realizuar me mjetet e BE, problemet ekologjike të Port Milenës, decentralizimi i pushtetit i cili Komunën e Ulqinit e ka lënë pa kompetenca në pjesën më të madhe të territorit e cila përfshinë zonën e Të mirave detare si dhe pjesën më të vogël të pasurisë që ka mbetur në pronësi të Komunës së Ulqinit. Z. Drobniç ka thënë se shumica e problemeve mund të zgjidhen përmes aplikimit me projekte për IPA fondet, pasi që është duke u përgatitur programi për periudhën prej vitit 2014 deri në vitin 2020, e ky program është parashikuar për përgatitjen e Malit të Zi për anëtarësim të plotë në BE dhe që do të përfshijë projekte që zgjidhin pikërisht probleme të këtilla.
Ai gjithashtu ka përmendur se të gjitha aktivitetet para hyrjes në BE janë shumë të rëndësishëm, por pas hyrjes së Malit të Zi në BE lartësia e mjeteve në dispozicion mund të arrijë edhe deri në 2,5 % e prodhimit të brendshëm bruto por shumë i rëndësishëm është kapaciteti absorbues. Ai gjithashtu thotë që hyrjen në BE e jep edhe korniza legjislative në kuadër të të cilës duhet harmonizuar shteti që do të thotë edhe kornizë më e rregulluar për investime. Pas takimit përfaqësuesit e Komunës së Ulqinit dhe delegacioni i BE kanë vizituar Valdanosin dhe Kalanë, e më pas në hotelin Otrant është mbajtur panel diskutimi në temën “Mali i Zi në procesin e integrimeve EU”.
Opština Ulcinj / Komuna e Ulqinit
Tel: +382 30 412 050
Fax: +382 30 412 413
Adresa: Bul. Skenderbeu bb, 85360 Ulcinj, MNE