Gjimnazi privat “ Drita” festoi tetëvjetorin e themelimit – Video
Mesazhe pune e arsimi kombëtar
Gjekë Gjonaj
Këtë ditë feste e gëzimi, e cila u mbajt mbrëmjen e 6 marsit në objektin e ri shkollor, e madhëruan pjesëmarrës të shumtë, në radhë të parë prindërit, të cilët rritën gëzimin e fëmijëve të tyre. Të pranishëm në këtë manifestim të organizuar bukur, përveç nxënësve, mësimdhënësve, udhëheqësisë dhe ish nxënësve të shkollës, ishin edhe kryetari i Komunës së Ulqinit, Fatmir Gjeka, deputeti në Kuvendin e Malit të Zi, Luigj Shkrela, Kryetari i Këshillit Nacional të Shqiptarëve në Malin e Zi dhe deputeti Genci Nimanbegu, kryetari i Kuvendit Komunal të Ulqinit Fuad Haxhibeti dhe nënkryetari i Komunës së Tivarit Osman Subashiq.
Ky jubile i rëndësishëm për arsimin tone kombëtar përkon me një datë të shënuar për arsimin shqip 7 Marsin, Ditën e Mësuesit apo siç quhet ndryshe ditëlindja e shkollës së parë shqipe. Andaj me këtë rast nga kjo kremte u përcollën me shumë respekt urimet për të gjithë mësimdhënësit tanë të cilët me punën,pasionion dhe dashurinë për profesionin, për dijet ,për nxënësit i kanë dhënë një vizion të ri traditës së shkëlqyer të arsimit kombëtar.
Bisha: Gjimanzi “ Drita” do të vazhdojë misionin e shenjtë
Themeluesi i Gjimnazit privat “ Drita” Hysein Bisha fillimisht përshëndeti të pranishmit dhe shprehu optimizmin e tij se ky institucion do të vazhdojë misionin e tij të shenjtë.
“Edukimi dhe arsimi janë shtyllat kryesore të formimit të një kombi. Pa këto nuk mund të ketë sukses as Ulqini as Mali i Zi. Stafi drejtues dhe pedagogjik i këtij gjimnazi privat janë angazhuar shumë që ky institucion të mbijetojë edhe përkundër vështirësive të theksuara financiare. Falë këtij përkushtimi dhe pasioni për arsimin tonë kombëtar Gjimnazi “ Drita” vazhdon të punojë dhe uroj e shpresoj që të ketë jetëgjatësi. Gjatë tetë viteve të shkuara në këtë shkollë janë diplomuar 96 nxënës të cilët tani ndjekin shkollimin superior nëpër universitete të ndryshme në Mal të Zi, Kosovë , Shqipëri e vende të tjera, të cilët shpresojmë se së shpejti do të kthehen të kontribuojnë në këtë qytet” tha Bisha, duke ftuar Komunën e Ulqinit dhe Qeverinë e Malit të Zi të mbështesin këtë gjimnaz në mënyrë që të vazhdojë misionin e tij të shenjtë.
Gjeka: Përherë do të keni përkrahjen time
Kryetari i Komunës së Ulqinit Fatmir Gjeka,duke iu uruar nxënësve dhe mësimdhënësve të këtij institucioni të parë privat arsimor-edukativ në gjuhën shqipe në Mal të Zi jubileun e tetë premtoi mbështetjen e tij, respektivisht të institucionit që ai drejton.
“Gjimnazi “Drita” mund të shërbejë si shembull i afrimit të arsimit tonë me arsimin evropian ku synojmë të integrohemi. Ne jemi të vetëdijshëm për rrugën e vështirë që e përcjell arsimin shqip në Malin e Zi dhe reformat që e presin . Por ne kemi provuar dhe kemi ditur t’ia dalim dhe po ia dalim me sukses. Ju jeni siguria e procesit të pandashëm të modernizimit të arsimit dhe të rritjes cilësore të tij . Andaj ju uroj suksese dhe ju garantoj se tek komuna e Ulqinit dhe tek unë si kryetar përherë i keni dyert e hapura dhe do të keni përkrahjen tone”, u shpreh Gjeka
Nimanbegu: Hap vizionar me shumë përgjegjësi
Kryetari i Këshillit Nacional të Shqiptarëve dhe deputeti Genci Nimanbegu në fjalën e tij përshëndetëse hapjen e kësaj shkolle e vlerësoi si një hap të guximshëm dhe vizionar.
-Gjimnazi privat “Drita” eshtë nisma më serioze afariste, më kuptimplote dhe me përgjegjësi më të madhe që është bërë vitet e fundit në Komunën e Ulqinit. Hapja e një shkolle private në gjuhën shqipe është një hap për të cilin është dashtur vizion, guxim, por edhe durim. Këshilli Nacional i Shqiptarëve çdo herë do të jetë përkrahës i nismave të ndryshme të kësaj shkolle. Dëshiroj që jo vetëm Komuna e Ulqinit por edhe qeveria të japë mjete sa më të mëdha për ndihmën e funksionimit të kësaj shkolle private e cila sigurisht me punën e saj do të nxjerrë nxënës të mirë të cilët me punë do ta dëshmojnë veten, theksoi, Nimanbegu.
Nxënësit më të mirë
Nxënësja më e mirë për këtë vit shkollor u shpall Aida Rexhepi.
Kujdestarët e klasëve për sukses të shkëlqyeshëm dhe sjellje shëmbullore i shpëblen me lëvdata këta nxënës: Besart Hoxhiq, Rajmond Gjonaj, Dorjeta Nasufaga, Muhamed Bisha, Leart Kallaba, Enis Lika, Besmir Asllani, Aida Rexhepi, Arbër Markashi, Dafina Taganoviq, Gentiana Çoboviq, Zade Rexha, Sabina Suloviq dhe Amina Bisha.
Programi festiv
Për nder të kësaj kremteje u shfaq një video reportazh e përgaditur nga profesori i gjuhës shqipe Haxhi Shbani në bashkëpunim me nxënësit e kësaj shkolle, u përurua objekti i ri i shkollës, i pajisur me kabinetet dhe mjetet mësimore të nevojshme për zhvillimin e procesit edukativo-arsimor sipas kërkesave të kohës dhe u promovua numri dy i revistës shkollore “ Drita”.Pjesë e këtij programi festiv ishin edhe punimet e nxënësve nga lënda e artit figurativ të cilat kënaqën frekuentuseit e kësaj ekspozitë,derisa për mysafirët e ftuar u shtrua një koktej rasti.
Revista shkollore “Drita”
Në faqet e kësaj reviste të veçantë me 34 faqe kolor nxënësit dhe mësimdhënësit e kësaj shkolle kanë botuar shumë shkrime e artikuj interesantë. Revista besoj se do të luaj rolin e saj të rëndësishëm në afirmimin e vlerave të punës arsimore dhe edukative të këtij institucioni të suksesshëm. Urojmë që botimi i revistës shkollore “ Drita” të jetë një nismë e mbarë dhe nxitje për afirmimin e talentëve të rinj, dashamirë të fjalës së shkruar.