Nënshkruhet protokoll marrëveshja e partneritetit ndërmjet komunës së Ulqinit dhe distriktit 23 të Vjenës

Hapet rruga për realizimin e projekteve të përbashkëta
Ulqin - Kryetari i Komunës së Ulqinit, Gëzim Hajdinaga dhe homologu i tij i distriktit 23 të Vjenës, Manfred Wurm, nënshkruan të martën Protokoll marrëveshjen e partneritetit.
Kryetari Hajdinaga tha me këtë rast se kjo ditë përbën një datë të rëndësishme për Ulqinin
“Ne kërkojmë që nëpërmes kësaj kryqendre të kulturës europiane të takohemi në adresën e përbashkët evropiane”, tha Hajdinaga.
Ai tha se me nënshkrimin e kësaj marrveshjeje, Ulqini jep edhe një kontribut shtesë që Mali i Zi të realizojë synimin që i ka vënë vetes, “hyrjen në familjen demokratike europiane”.
Edhe kryetari i distriktit 23 të Vjenës, Manfred Wurm, vlerësoi rëndësinë e kësaj marrëveshjeje duke nënvizuar se ajo nënshkruhet në përvjetorin e dytë të pavarësisë së Malit të Zi.
Ai shprehu bindjen se në kuadër të kësaj marrëveshjeje do të realizohen shumë projekte.
“Kjo marrëveshje do të shërbejë për ne, por edhe për rininë tonë e cila shpresoj se do ta vazhdojë këtë marrëveshje”, tha Wurm.
Marrëveshja e partneritetit parashikon ndër të tjera bashkëpunim në këmbimin e mendimeve dhe përvojave në të gjitha fushat me rëndësi, organizimin e aktiviteteve të përbashkëta kulturore, sportive, etj.
Marrëveshja parashikon po ashtu që kryetari i Komunës së Ulqinit dhe ai Distriktit 23 të Vjenës të takohen së paku një herë në vit në Ulqin dhe në Vjenë, për të përgatitur programin e përbashkët.
Në ceremoninë e nënshkrimit të Protokoll marrëveshjes mori pjesë edhe ambasadori austriak në Podgoricë, Florian Rauning dhe personalitete të tjera.
I.Kallaba
KOHA JAVORE

Promovohet oferta e verës turistike të Ulqinit në Pejë

“Ne jemi këtu më tepër që ti falënderojmë kosovarëve për ata që kanë bërë për Ulqinin sepse me ardhjen e tyre ka ndikuar shumë të shqiptarët në Ulqin në ruajtjen edhe të identitetit shqiptar atje”, ka thënë në takimin promovues i pari i Ulqinit Gëzim Hajdinaga
Ka ardhur të premten në Pejë bashkë me ekspertë të turizmit dhe udhëheqës komunal, kryetari i komunës së Ulqinit Gëzim Hajdinaga për të promovuar ofertën turistike për vitin 2008. “Këtë vit kosovarët duhet të vijnë edhe më tepër në Ulqin. Në Mal të Zi ka një përqindje të vogël të njerëzve që dëshiron që kosovarët të mos vinë më në Ulqin dhe nëse doni që ti plotësoni dëshirat e asaj pakice, atëherë mos ejani”, është shprehur në paraqitjen e tij promovuese Hajdinanga. Ai në këtë takim është përballur edhe me pyetjet e shpeshta të mediave se pse po heziton Mali i Zi për ta njohur shtetin e Kosovës dhe se sa kanë bërë liderët e caktuar shqiptarë, pra mes tyre edhe z. Hajdinaga për të lobuar atje që shteti malazez ta pranojë pavarësinë e Kosovës.
“Nëse nuk ndodh njohja më herët atëherë ardhja juaj është edhe një arsye më shumë për t’i treguar qeverisë së Malit të Zi se në një formë Ulqini është i tyre”, është përgjigjur Hajdinagaj për të vazhduar se “Sa i takon mosnjohjes momentale të pavarësisë së Kosovës nga zyrtarët malazez , mendoj që kjo nuk duhet të ndikojë në ardhjen apo mos ardhjen e turistëve kosovar. Me gjithë atë nuk ma merr mendja që mosnjohja momentale edhe deri në sezonin turistik e shtetit të Kosovës mund të ndikojë në mosardhjen e kosovarëve në Ulqin. Me ardhjen tuaj në numër sa më të madh për të veruar në Ulqin, sikur keni bërë edhe viteve tjera, po ndikoni në ruajtjen e identitetit shqiptar të ulqinakëve. Nëse shqiptarët e Kosovës nuk shkojnë këtë vit për të pushuar në detin e Ulqinit, atëherë kështu do t’u plotësohen apetitet e atyre që nuk e duan prezencën e Kosovës në Malin e Zi”, është përgjegjur kreu i Ulqinit.
Hajdinaga u ka premtuar pejanëve dhe qytetarëve të Kosovës në përgjithësi se çmimet në këtë sezon veror nuk do të jenë më të larta nga ato të vitit të kaluar. I pari i Ulqinit ka premtuar edhe se për shqiptarët e Kosovës që vendosin për të veruar në Ulqin nuk do të ketë probleme sa i takon sigurisë gjatë gjithë udhëtimit të tyre nëpër Mal të Zi. “Nuk do të ketë probleme të sigurisë për ta, aq më shumë pasi tani Mali i Zi është i pavarur”, ka premtuar Hajdinaga.
Mos jep besë Hajdinaga !
Hajdinaga dhe ndonjë lider tjetër në Mal të Zi nuk duhet shumë të japin besë për sigurinë e shqiptarëve të Kosovës gjatë rrugëtimit të tyre nëpër Malin e Zi, që është bërë i pavarur edhe falë votës së vëllezërve tanë atje në Malësi, e që si shpërblim për këtë policia malazeze maltretoi, ofendoi rëndë e në baza nacionale shumë malësorë e familje të tyre. Po ashtu Hajdinaga duhet të mos harrojë se gjatë vitit të kaluar pikërisht nëpër rrugët e Malit të Zi e nga policia e saj janë ndaluar 10 të rinj shqiptarë të Kosovës, që po ktheheshin nga kurbeti dhe janë dërguar ngutshëm në gojën e ujkut, pra në burgjet serbe. Këta të rinj i kanë besuar demokracisë së Malit të Zi, demokraci e urtësi, të cilën ky shtet e reklamoi gjatë katrahura e zhvendosjes së popullit të Kosovës nga dhuna e policisë e ushtrisë vrastare serbe. Këta të rinj besuan në këtë demokraci, por, ata përfunduan nën pranga dhe hoqën të zitë e ullirit nëpër burgjet serbe.
Mirë është që një pjesë e shqiptarëve të Kosovës të shkojë verës në Ulqin për hir të shqiptarëve atje në mënyrë që të ndihmohet ekonomia familjare e tyre. Por, te e fundit, vizitorët le të vendosin vetë se a do të marrin rrugë drejt Ulqinit apo Durrësit. Ajo që është keq e duhet thënë troç është se disa liderë shqiptarë në Malin e Zi po i besojnë shumë pushtetit atje dhe liderëve malazez e serbë. Thanë se Mali i Zi do ta pranojë në maj shtetin e Kosovës, por Miodrag Zhivkoviq i liberalëve e veçmas funksionari i listës serbe Jovan Vuçoviq është edhe më ekstrem dhe deklaron se një njohje e tillë nuk do të bëhet tani së shpejti e madje as që përmendet ndonjë datë e afërt se kur mund të ngjajë kjo njohje.
Disa liderë shqiptar në Mal të Zi duhet të deklarojnë vetëm aq sa kanë kaçik dhe aq sa i pyet puna atje. Le të mos hidhërohen ulqinakët, por unë si shqiptarë i Kosovës bashkë me familjen time dhe me shumë farefis nuk do të shkojmë rrugëve të Malit të Zi e as drejt detit të Ulqinit derisa nuk vihet drejtësia në vend, pra derisa nuk lirohen nga burgu malësorët, që pa asnjë faj po mbahen në burgun famëkeq të Shpuzit dhe derisa Mali i Zi nuk e njeh Kosovën si shtet të pavarur. Nuk ke pse shkon nëpër shtetin e atij që nuk të njeh TY.
Rrahman Jasharaj
Malesiaforum

http://www.vimeo.com/603631

Presidenti Sejdiu priti kryetarin e Komunës së Ulqinit, z.Gëzim Hajdinagën

Prishtinë, 8 maj 2008- Presidenti i Repuiblikës së Kosovës, dr. Fatmir Sejdiu takoi sot kryetarin e Komunës së Ulqinit, z. Gëzim Hajdinaga, me të cilin bisedoi për rrjedhat e procesit pas pavarësimit të Kosovës në të gjitha sferat e zhvillimit të saj.
Duke iu referuar pavarësisë së Kosovës si çelës themelor për hapjen e perspektivës së mëtejme, Presidenti Sejdiu theksoi përkushtimin e institucioneve të vendit për vazhdimin e një qasjeje edhe më të avancuar për jetësimin e vlerave dhe parimeve që janë përfshirë në Kushtetutën e Kosovës.
Sipas tij, në fokus të veçantë do të vazhdojë të jetë qasja integruese ndaj komuniteteve pakicë për të dëshmuar Kosovën si shtet të barabartë për gjithë qytetarët e saj.
Kryetari i Komunës së Ulqinit z. Gëzim Hajdinaga, në emër të Komunës dhe qytetarëve të Ulqinit i uroi Presidentit të Kosovës pavarësimin e vendit.
Lajme nga Ulqini

http://www.vimeo.com/603631

35 anëtarët e Këshillit Nacional Shqiptar në Mal të Zi

Këshilli Nacional Shqiptar përbëhet prej 35 anëtarëve. Njëzet prej tyre e kanë siguruar këtë të drejtë në bazë të funksionit: Fuad Nimani, ministër për Mbrojtjen e të Drejtave të Njeriut dhe Pakicave, Gëzim Hajdinaga, kryetar i Komunës së Ulqinit, Smail Maliq Çunmulaj, kryetar i Komunës Urbane të Tuzit, Mehmet Bardhi, kryetar dhe deputet i LD në MZ, Ferhat Dinosha, kryetar dhe deputet i UDSH-së, Amir Hollaj, kryetar i PPD-së, Nazif Cungu, kryetar i Forcës së Re Demokratike - Forca, Ali Doda, kryetar i BDSH-së, deputetët e PDS-së Omer Axhoviq dhe Luigj Shkreli, deputeti i Alternativës Shqiptare, Vasel Sinishtaj, kryetarët e klubeve të këshilltarëve në Kuvendin e Komunës së Ulqinit, Hatixha Gjonoviq (UDSH), Kadri Sinani (LD në MZ), Kapllan Muçaj (PPD) dhe Genci Nimanbegu (Forca), kryetarët e klubeve të këshilltarëve në Kuvendin e Komunës së Plavës, Ramo Sinanaj (UDSH) dhe Miftar Balidemaj (LD në MZ), dhe kryetarët e klubeve të këshilltarëve në Kuvendin e Komunës Urbane të Tuzit, Fadil Kajoshaj (UDSH), Lindon Gjelaj (ASH) dhe Marash Dedvukaj (LD në MZ). Ndërsa 15 anëtarët e tjerë të këtij këshilli të zgjedhur në Kuvendin e Elektorëve janë: Agron Mehmedi, Ali Gjeçbritaj, Daut Ceka, Fadil Kovaçi, Gani Kukaj, Hajrudin Kovaçi, Husein Daciq, Ismail Doda, Mehmet Tafica, Musa Gjokaj, Naser Perasheviq, Palo Dreshaj, Tahir Gjonbalaj, Tahir Tahiri dhe Taip Kurti.
I.K
KOHA JAVORE

Në plazhin Kopakaban çelet me festime sezoni turistik në Ulqin

Festime te shumta me muzike live, kuzhine tradicionale, panaire me veshje dhe punime artizanale jane organizuar ne plazhin e Ulqinit ku eshte celur sezoni turistik. Version multimedial i ketij lajmi
ULQIN - Nen moton “ Mali I Zi nje qytet” eshte hapur zyrtarisht sezoni turistik, Ulqini 2008. Manifestimi qendror I cili kishte ne perberje te tij muzike live nga kengetaret me te mire nga Mali I Zi, kuzhine tradicionale, panaire me veshje dhe punime artizanale, ka zgjatur gjate gjithe dites deri ne oret e para te nates, ne plazhin Kopakabana.
Mbi 40 mije turiste dhe te ftuar nga Mali I Zi, Shqiperia, Kosova dhe Maqedonia, ishin te pranishem ne kete feste madheshtore, qe u organizuar ne kete qytet te vogel turistik. Kryetari I Komunes Ulqin Gezim Hajdinaga, nen kujdesin e vecante te te cilit eshte zhvilluar ky manifestim, u shpreh se kjo tradite e hapjes se sezonit turistik, do te vazhdoje edhe ne vitet e tjera, gjithashtu ka shprehur kenaqesine e tij, per frekuentimin e ketij plazhi, nga shume turiste, numri I te cileve eshte shtuar.
(B.Ajazi-News24/balkanweb)

http://www.vimeo.com/972604

Të shtunën në Ulqin u mbajt kuvendi i elektorëve për zgjedhjen e anëtarëve të këshillit nacional të shqiptarëve

U zgjodhën 15 anëtarë
Ulqin - Kuvendi i elektorëve zgjodhi të shtunën 15 anëtarët që do t`i përfaqësojnë në të ardhmen shqiptarët në Këshillin e tyre nacional.
Anëtarë të Këshillit Nacional të Shqiptarëve u zgjodhën Agron Mehmedi, Ali Gjeçbritaj, Daut Ceka, Fadil Kovaçi, Gani Kukaj, Hajrudin Kovaçi, Husein Daciq, Ismail Doda, Mehmet Tafica, Musa Gjokaj, Naser Perasheviq, Palo Dreshaj, Tahir Gjonbalaj, Tahir Tahiri dhe Taip Kurti.
Në Kuvend morën pjesë 48 elektorë nga 49 sa ishin ftuar.
Përveç 15 anëtarëve të zgjedhur në Kuvend, anëtarë të Këshilli Nacional të Shqiptarëve në bazë të funksionit do të jenë edhe Fuad Nimani, ministër për Mbrojtjen e të Drejtave të Njeriut dhe Pakicave, Gëzim Hajdinaga, kryetar i Komunës së Ulqinit, Smail Maliq Çunmulaj, kryetar i Komunës Urbane të Tuzit, Mehmet Bardhi, kryetar dhe deputet i LD në MZ, Ferhat Dinosha, kryetar dhe deputet i UDSH-së, Amir Hollaj, kryetar i PPD-së, Nazif Cungu, kryetar i Forcës së Re Demokratike - Forca, Ali Doda, kryetar i BDSH-së, deputetët e PDS-së Omer Axhoviq dhe Luigj Shkreli, deputeti i Alternativës Shqiptare, Vasel Sinishtaj.
Anëtarë të Këshillit Nacional Shqiptar do të jenë edhe kryetarët e klubeve të këshilltarëve në Kuvendin e Komunës së Ulqinit, Hatixha Gjonoviq (UDSH), Kadri Sinani (LD në MZ), Kapllan Muçaj (PPD) dhe Genci Nimanbegu (Forca), në Kuvendin e Komunës së Plavës, Ramo Sinanaj (UDSH) dhe Miftar Balidemaj (LD në MZ), dhe në Kuvendin e Komunës Urbane të Tuzit, Fadil Kajoshaj (UDSH), Lindon Gjelaj (ASH) dhe Marash Dedvukaj (LD në MZ).
Në bazë të Ligjit për të drejtat dhe liritë e pakicave, këshillat nacionale do të kenë rol shumë të rëndësishëm në jetën e ardhshme politike në fushën e përmirësimit të pozitës së pakicave në shoqërinë e Malit të Zi.
Ismet Kallaba
KOHA JAVORE

Bisedë me Muhamed Gjokaj, përfaqësues i zyrës së shoqatës “Atdheu na Bashkon” në Tuz

Për promovimin e lirisë dhe demokracisë
Koha javore: Në fillim të këtij muaji lëvizja “Atdheu na Bashkon” hapi zyrën në Tuz, cili do të jetë misioni i saj?
M. Gjokaj: Disa nga pyetjet më me rendësi për popullin tonë janë zgjidhur, siç është çështja e Kosovën, për të cilën është shpenzuar një energji padyshim e madhe nga ana e diasporës sonë. Pra, mërgata shqiptare në momentet më delikate ka luajtur rol të rëndësishëm, pothuajse edhe vendimtar, për internacionalizimin e çështjes së Kosovës bile edhe të pozitës së gjithëmbarshme të popullit shqiptar - në tërësi.
Shqiptarët, si komb, kurrë nuk kanë gëzuar pozitë më të mirë se sot, por në nivelin lokal si shqiptarë në Mal të Zi jemi në një situatë shumë më të keqe se më parë. Prandaj, si përgjigje e kësaj del se mërgata jonë duhet të angazhohet më intensivisht në internacionalizimin e pozitës së popullit shqiptar në Mal të Zi, pse jo edhe të ndikojnë dukshëm në demokratizimin e shoqërisë në tërësi.
Besoj se është edhe e drejtë e mërgatës, e cila e ka prejardhjen nga këto treva, që të ndikojë dukshëm në përmirësimin e pozitës sonë, duke ditur se më se gjysma e popullatës gjendet jashtë vendlindjes dhe se inkuadrimi i tyre në procese dhe rrjedha shoqërore është një e drejtë që u takon.

Koha javore: Zyra me emrin “Komisioni për të drejtat e njeriut dhe mbrojtjen e pakicave kombëtare” do të merret edhe me të drejtat e pakicave të tjera, apo thjesht vetëm me shqiptarët?
M. Gjokaj: Në një shtet ku pushtetarët mund të shpallin çdokënd kriminel apo terrorist pa u gjykuar, ose në një shtet ku kryeprokurorja deklaron se nuk u beson gjyqeve, atëherë vërtet se kemi nevojë për këso lloj komisionesh për të mbrojtur të drejtat e njerëzve që janë viktima të rasteve të tilla. Ne si komision, në parim, nuk do të bëjmë dallime kur është fjala për të drejtat e njeriut dhe mbrojtjen e pakicave kombëtare. Por këtu duhet vendosur një paralele, sepse të gjithë nuk janë të diskriminuar në të njëjtën masë. P.sh. si parametër të kësaj paraleleje, kemi aksionin policor “Fluturimi i shqiponjës”. Pra, neve na kanë ndodhur ngjarje që fluturuan mu nga e kaluara e afert e Ballkanit dhe rënduan mbi popullin tonë, i cili në asnjë mënyrë nuk e meritonte këtë.
Imagjinonie shoqërinë që jep më se shtatëdhjetëmijë vullnetarë dhe merr pjesë në luftrat përreth, që kanë shkaktuar qindra e mijëra të vrarë dhe të masakruar. Nuk arrin të burgosë apo të akuzojë asnjë person të vetëm për krime lufte apo terrorizëm, kurse në anën tjetër pa ndodhur asgjë, burgos, torturon dhe shpall terroristë 15 vetë. E gjatë tërë kësaj drame, pushteti ende mbetet i njëjti, me të njëjtit protagonistë.
Kjo tregon se kjo shoqëri ka nevojë për komisione dhe organizata që promovojnë demokracinë dhe mbrojnë liritë dhe të drejtat e njeriut. Ky është treguesi më i mirë se gjendemi në vendin dhe kohën e duhur.

Koha javore: Si do të funksionojë kjo zyrë?
M. Gjokaj: Lëvizja është një asosciacion shoqatash që veprojnë në SHBA, të cilat u bashkuan në një organizatë që është e regjistruar në shtetin e Nju Jorkut. Kjo organizatë ka kryesinë e vet, ka Statutin e vet dhe agjendën e veprimtarive të veta. Në kuadër të programit që është përqendruar në përmirësimin e pozitës së popullit shqiptar në Mal të Zi, është edhe hapja e zyrës në vendlindje. Kjo e drejtë bazohet në statut dhe si e tillë trajtohet si vendim statutor. Gjithashtu, si zyre jemi të paraqitur në Ministrinë e Drejtësisë së Mali të Zi, ku jemi të regjistruar dhe trajtohemi si organizatë e huaj. Kaq nga aspekti formal. Kurse nga ana e aspektit të veprimit (funksional) ne jemi një grup homogjen, që në hierarkinë e organizimit tonë nuk e kultivojmë kultin e individit apo liderizmit, por atë të hierarkisë horizontale dhe atë të punimit në grup, ku kryetari është - primus inter pares (pra, i pari në mes të barabartëve).
Pra asnjë veprim apo deklaratë nuk del në opinion pa u konsultuar bordi drejtues dhe ekpertët e lëmisë përkatëse dhe në fund të nënshkruhet nga kryetari.

Koha javore: Si e shikoni integrimin e pakicës shqiptare?
M. Gjokaj: Sigurisht se përvoja e anëtarëve tanë dhe e bordit drejtues, për tzu integruar në një shoqëri siç është shoqëria amerikane, do të kontribuojë dukshëm që këtë standard ta implementojmë edhe në shoqërinë tonë. Gjithsesi, integrimi i popullit tonë në shoqëri duhet të ndodhë. Kjo duhet të bëhet vetëm e vetëm me kusht që të ruhet identiteti ynë, që do të thotë duke ruajtur gjuhën, kulturën dhe specifikat që neve na dallojnë nga të tjerët. Pra, këto diversitete duhet të trajtohen si pasuri dhe një arsye më shumë për tzu respektuar ashtu që të gjithë së bashku të plotësojmë mozaikun multietnik të shoqërisë sonë.

Koha javore: Si do të jetë bashkëpunimi i kësaj zyre me OJQ-të e tjera në MZ?
M. Gjokaj: Bashkëpunimi ynë me OJQ-të e ndryshme nuk do varet vetëm nga vullneti ynë, por më shumë nga natyra e veprimtarive që ne do të zhvillojmë. Por gjithsesi kam shpresë se do të hasim në përkrahje të fuqishme tek OJQ-të vendore dhe se bashkëpunimi me to do të jetë esencial në aktivitetet tona këtu.

Koha javore: Sa do të jetë në gjendje kjo zyre që të kontribuojë në demokratizimin e shoqërisë në tërësi?

M. Gjokaj: Shoqëria Malazeze është një term mjaft i gjerë dhe jemi të vetëdijshëm se në një shoqëri që ende nuk është liruar nga e kaluara, ende janë prezente kultet e bisedave pas darkës apo favorizimet në bazë të përkatësive fisnore, nacionale etj. Kemi një shoqëri ku një pjesë e madhe nuk e don apo nuk e pranon shtetin ku jeton, dhe se nuk ekziston një koncensus minimal për pyetjet më vitale që çojnë drejt zhvillimit dhe demokratizimit të vendit etj.etj.Pra është më se normale se normat dhe standardet që aplikohen në demokracitë perëndimore, në SHBA e gjetiu, nuk mund të implementohen apo të japin rezultatë në shoqërinë tonë.Që do të thotë se si organizatë jemi më se të vetëdijshëm se nuk mund të ndikojmë shumë në këtë drejtim. Por pa dyshim do të tentojmë të sensibilizojmë shumë probleme me të cilat përballemi si shoqëri. Kurse preokupimi ynë kryesor është ai i popullit shqiptar në Mal të Zi dhe gjetja e moduseve që do të çojnë deri tek përmirësimi real dhe kualitativ i pozitës sonë. Sepse me integrimin e plotë të pakicave përmbushet standardi dhe kushti më kryesor për tzu antarësuar në integrimet euroatlantike.

Koha javore: Lëvizja “Atdheu na Bashkon” ka ndërmend të hapë edhe edhe një zyre tjetër në MZ - (ose ajo ka paralajmëruar zyrën tjetër), për çka është fjala?
M. Gjokaj: Sigurisht se një përgjigje më kompetente do ta merrni tek bordi drejtues, por gjithsesi ne jemi një organizatë ambicioze dhe besoj se në të ardhmen do të kemi edhe shumë e shumë individë e organizata që do të kyçen për ta ndihmuar vendlindjen.
Ky është vetëm fillimi i veprimtarisë sonë dhe besoj se shqiptarët në Mal të Zi me angazhimin tonë dhe të subjekteve politike që duan bashkëpunim shumë shpejt do të krijojnë një koncensus kombëtar për hartimin e një platforme të përbashkët politike dhe Tuzi do ta fitojë komunën e plotë, sikur komunat e tjera, si e drejtë e garantuar.
Gjithsesi, aktivitetet e një organizate shqiptaro-amerikanë këtu do të gjejnë hapësirë të mjaftueshme për të promovuar liri dhe demokraci si vlera që janë simbol dhe pasqyrë e shoqërisë amerikane ku e ka bazën kjo organizatë.
Bisedoi: Rrok Dushaj
(Koha Javore)

Ambasadori Amerikan Roderik Mur vizitoi javën e kaluar Ulqinin

Gatishmëri për bashkëpunim të mëtejshëm
Ulqin - Ambasadori amerikan në Podgoricë, Roderik Mur, vizitoi javën e kaluar Ulqin, ku u prit nga kryetari i Komunës së Ulqinit, Gëzim Hajdinaga, së bashku me kryetarin e Kuvendit të Komunës së Ulqinit, Muhamet Nika, dhe bashkëpunëtorët e tyre.
Kryetari Hajdinaga e falënderoi Ambasadën dhe Qeverinë e SHBA-së për angazhimin dhe realizimin e disa projekteve në Ulqin dhe në trevat e tjera ku jetojnë shqiptarët në Mal të Zi.
Ai e ka njoftuar ambasadorin Mur me perspektivën zhvillimore të qytetit, tenderet që planifikohen të hapen për zonat më atraktive të qytetit, me theks të veçantë në tërheqjen e kapitalit amerikan, përfshirjen e diasporës në rrjedhat zhvillimore të qytetit si dhe për klimën e volitshme investuese në Mal të Zi.
Nga ana tjetër, ambasadori amerikan Mur e falënderoi kryetarin e Komunës së Ulqinit për pritjen e përzemërt dhe shprehu gatishmëri për bashkëpunim të mëtejshëm.
Kryetari Hajdinaga dhe ambasadori Mur vizituan zonat valorizimi i të cilave pritet me tenderët e ardhshëm, si dhe morën pjesë në prezantimin e programit të inicuar nga Ambasada e SHBA-së për kontrollin e eksportit dhe sigurisë së kufijve në Zogaj të Ulqinit.

(Kohapress)

Dhurohen sasi e konsiderueshme gjaku nga Shqiptaret e Komunes se Ulqinit

Ulqin:Dhurohen sasi e konsiderueshme gjaku nga Shqiptare e Komunes se Ulqinit. Kryetari i Komunes Ulqin Gezim Hajdinaga i shoqeruar nga mjeket e Qendres Shendetsore Ulqin kane dorezuar mbreme gjakun e dhuruar, ndihme te plagosurve ne Gerdec te Vores Shqiptaret e Malit te Zi jane solidarizuar me tragjedine egerdecit duke dhuruar gjak keshtu mbreme kryetari i Komunes Ulqin Gezim Hajdinaga, Drejtori i Shtepise se Shendetit Gani Karamanaga dhe Mjekja Zylfie Duraku, kane sjelle me vete nje sasi te konsiderushme gjaku ne Spitalin Rajonal te Shkodres. Kryetari i Komunes Ulqin Gezim Hajdinaga un shpreh se ne kemi ngritur shtabin e emergjences ne Ulqin se bashku me mjeket dhe jemi ne gatishmeri te plote por fatmiresisht situata eshte duke u qetesuar, ndersa jam i obliguar nga qeveria Malazeze te deklaroj se mbeshtetja nuk do mungoj.
Drejtori i shtepise se shendetit karamanag u shpreh se sasia e gjakut qe kemi sjelle eshte e vogel po ne do vijojm aksionin e dhurimit edhe ne ditet ne vijim ne jemi nje komb dhe duhet t’i ndihmojme njeri tjetrit.
Mjekja e cila ka qene edhe vete dhuruese u shpreh se ne kemi pasur disa pengesa ne dhurimin e gjakut pasi dhuruesit vullnetar duhet te udhetonin drejte Tivarit pasi atje eshte edhe qendra e transfuzionit por solidariteti i Shqiptareve ne Mal te Zi nuk do mungoj.
Dorezimi i gjakut u be ne prezence te Prefektit te Qarkut Shkoder Cungu dhe Drejtoreshes Alma Kurti te cilet i falenderuar miqt nga Ulqini per ndihmen e dhene dhe pershtypje e mire qe u krijua me gjestin dhe gatishmerin e shfaqur ne ne momentet e para kur lajmi i tragjedise u dha ne media.

INFO SHKODRA

Në Ulqin u mbajt tryeza e rrumbullakët ” E ardhmja e shqiptarëve në Mal të Zi”

Shqiptarët nuk kanë trajtim të barabartë
Në organizim të Lëvizjes ” Atdheu na Bashkon”, që përfaqëson shumicën e organizatave dhe shoqatave të shqiptarëve nga Mali i Zi në Shtete të Bashkuara të Amerikës organizoi në Ulqin, më 4 priill 2008, tryezën e rrumbullakët ” E ardhmja e shqiptarëve në Mal të Zi”. Në këtë takim, ku morën pjesë përfaqësues të jetës politike, të sektorit civil dhe intelektual të pavarurë nga trevat etnike shqiptare në Malin e Zi, u trajtua e ardhmja politiko-juridike, ekonomike, edukativo-arsimore dhe kulturore e shqiptarëve në këtë republikë.
Kryetari i Lëvizjes ” Atdheu na Bashkon” , Gjon Lulgjuraj , në fjalën e tij të hapjes së kësaj tryeze në të cilën nuk ishte i pranishëm kreu i UDSH-së z. Ferhat Dinosha, edhe pse sipas organizatorit ka qenë i ftuar, shpalosi shqetësimin e shoqatës për të drejtat e minoriteve, veçmas të shqiptarëve në shtetin e pavarur të Malit të Zi, me procesin e privatizimit dhe me ligjet që rregullojnë këtë fushë, me decentralizimin, me shitjet dhe zhvillimin ekonomik në Ulqin, me mungesën e komunës së mëvetësishme të Malësisë, me mungesën e perspektivës për punësim të shqiptarëve në sektorin qeveritar si dhe me trajtimin e të burgosurve shqiptarë nga Malësia në aksionin policor malazez ” Fluturimi i shqiponjës” , me torturën që ndaj tyre ka ushtruar policia malazeze si dhe me zvarritjen e procesit gjyqësor ndaj 18 malësorëve të akuzuar për ” terrorizëm dhe prishje të rendit kushtetues në Mal tzë Zi”.

Qytetarë të rendit të dytë
Lideri dhe deputeti i Lidhjes Demokratike në Mal të Zi, z. Mehmet Bardhi, duke folur për këtë temë, pohoi se situata e shqiptarëve në Malin e Zi të pavrur është më e keqe se kurrë. ” Kushtetuta e Malit të Zi nuk siguron barazi të plotë të qytetarëve as barazi të plotë të pjesëtarëve të nacionaliteteve të ndryshme. Ajo, shqiptarëve nuk u siguron barazi të plotë, liri dhe të drejta të barabarta . Edhe pse në preambulë të këtij akti më të lartë shtetëroro-juridik përmendet emri shqiptar dhe gjuha shqipe, nuk thuhet se shteti i Malit të Zi është shtet i barabart i të gjithë qytetarëve.Shqiptarët dhe gjuha shqipe janë diskriminuar. Po ashtu në kushtetutë nuk ekziston as përfaqësimi autentik i shqiptarëve. Dokumentet personale të shqiptarëve nuk janë rregulluar ashtu siç kemi kërkuar Pra, ne shqiptarët konsiderohemi si qytetarë të rendit të dytë” tha me keqardhje Bardhi dhe shtoi se LD në MZ ka paraqitur 35 vërejtje dhe 19 amandamente në kushtetutën e re malazeze, por pushteti aktual i ka refuzar të gjitha.
Kryetari i Alternativës Shqiptare, Vasel Sinishtaj, njëherazi edhe deputet në Parlamentin e Malit të Zi, duke elaboruar të drejtat e shqiptarëve në Mal të Zi, vlerësoi se nuk implementohen ligjet në Mal të Zi, kur janë në pyetje minoritetet, respektivisht shqiptarët. Ai përmendi shumë probleme të kësaj natyre. ” Me kushtetuten e re shqiptarëve u është garantuar që emri dhe mbiemri i tyre në dokumente personale dhe të udhëtimit të shkruhen në gjuhën dhe alfabetin shqip. Mirëpo, kjo e drejtë e jona e patjetërsueshme nuk është propozuar në ligjin që rregullon këtë çështje, i cili është në procedurë. Problem tjetër i pazgjidhur për shqiptarët është edhe përfaqësimi i shqiptarëve në parlamentin republikan dhe në parlamentet lokale ku shqiptarët nuk janë shumicë: në Podgoricë, Tivar, Plavë dhe Rozhajë. Duhet kthyer nenet 23-24 të Ligjit mbi të drejtat e pakicave. Shqetësuese për ne shqiptarët është edhe ushtrimi i dhunës, maltretimet dhe fyerjet njerëzore të policëve malazezë ndaj malësorëve të paraburgosur në burgun e Spuzhës, ku shihet qartë mosrespektimi i lirive dhe të drejtave njerëzore të garantuara me kushtetutë. Ajo që ne na pengon më së shumti është shkelja e nenit 3 të Kartës kornizë për liritë dhe të drejtat e njeriut ku parandalohet dhuna sidomos atëherë kur bëhet me qëllim të nxjerrjes së deklaratës për të pranuar fajësinë.”, theksoi Sinshtaj. Loro Markiqi, avokat, pohoi gjithashtu se pushteti aktual po vazhdon me politikën e vjetër tashmë të njohur për të gjithë ndaj shqiptarëve, duke mospërfillë ligjet ekzistuese. ” Dëshmia më e mirë për këtë është rasti i keqtrajtimit të shqiptarëve ( malësorëve) të paraburgosurë në aksionin ” Fluturimi i shqiponjës” ndaj të cilëve policia malazeze ka ushtruar dhunë dhe torturë fizike e psiqike, gjë të cilën e kanë konfirmuar edhe shoqatat malazeze dhe të huaja që merren me liritë dhe të drejtat e njeriut, por pushteti gjithnjë hesht , duke shkelur ligjin. Dëshmi tjetër e mospërfilljes së ligjeve nga ana e gjyqësorit është edhe fakti se dy avokatëve shqiptarë në procesin gjyqësor të përmendur, të cilin e quaj politik i drejtuar jo vetëm kundër shqiptarëve të akuzuar, por kundër të gjithë shqiptarëve, na është ndaluar përdorimi i gjuhës shqipe. Kjo tregon qartë se në Mal të Zi ende vazhdon politka e vjetër ndaj shqiptarëve, duke na trajtuar si qytetarë të rendit të dytë”, tha Markiqi.

Këshilli Nacional Shqiptar - dekor i Qeverisë
Në mënyrë kritike u diskutua edhe për krijimin e Këshillit Nacional të Shqiptarëve. Shumica e pjesëmarrësve në debat u shprehën skeptik lidhur me funksionimin e duhur të Këshillit Nacional Shqiptar. Sipas tyre këshilli në fjalë dhe Fondi i Pakicave do të jenë në shërbim të pushtetit, i cili përmes njerëzve të vetë do të realizojë qëllimet e veta. U tha se nga 33 anëtarë të Këshillit Nacional Shqiptar vetëm shtatë prej tyre ekziston mundësia të jenë jopartiakë dhe si i tillë do të jetë dekor i Qeverisë së Malit të Zi, duke theksuar nevojën që në këtë këshillë të përfshihen intelektual të mirëfilltë që s`do të ndikohen nga politikanët. Po ashtu u dëgjuan edhe shumë mangësi në llogari të Ligjit që ka të bëjë me këshillat nacionale. Xhoana Perkaj, historiane dhe analiste pohoi se ideja për themelimin e Këshillit është e mirë por sistemi i votimit në Kuvendin e elektorëve për zgjidhjen e Këshillit nuk mundëson depërtimin e intelektualëve jopartiakë. Sipas saj ekziston mundësia e dyfishimit të funksioneve politke të politikanëve të evolvuar më parë në politikë.

Liderët politikë shqiptarë duhet të ndërgjegjësohen
Oratorët biseduan edhe për veprimtarinë e deritashme të subjekteve politike shqiptare dhe paraqitën nevojën e hartimit të një Platforme politike të përbashkët, e cila do të përfshinte problemet thelbësore të shqiptarëve në Mal të Zi. Përfaqësuesit e sektorit civil dhe intelektualët e pavaruar ishin të një mendimi se liderët politikë shqiptarë mbajnë përgjegjësinë kryesore për problemet e pazgjidhura të shqiptarëve në këtë republikë. Sipas tyre shqiptarët nuk kanë nevojë për 6 parti politike, por kanë nevojë që ato të bashkëpunojnë ngusht njëra me tjetrën e jo të jenë të ndara e të përçara aq sa elektorati shqiptar aktualisht është pothuaj i hutuar dhe nuk di se kujt t`ia besojë votën. Dr. Zylfie Gjoni -Duraku, drejtuese e Shoqatës së gruas ” Anima” fajin për gjendjen e krijuar tek shqiptarët në Malin e Zi e kërkoi tek vetvetja.

Tokat e shqiptarëve plaçkiten nga strukturat e shtetit
Në diskutimet e pasditës mbi të ardhmen ekonomike, edukativo - arsimore dhe kulturore të shqiptarëve në Mal të Zi u dëgjuan shumë vërjetje dhe mospajtime për mënyrën e privatizimit , kthimin e pronës dhe shfrytëzimin e resurseve natyrore. Lidhur me privatizimin u tha se ai nuk ka kurrfarë qëllimi tjetër përveç asimilimit dhe se asnjë ekspert i ekonomisë ose i politikës nuk mund ta arsyetojë këtë lloj privatizimi pa kontroll se shkon në të mirën e mirëqenjes së qytetarëve të kësaj komunë. Përkundrazi. Ramë Sinanaj nga fshati Hot, komuna e Plavës, kritikoi pushtetin malazez se nuk po ua kthen pronat shqiptarëve të kësaj komunë të cilët pesedojnë tapitë edhe përkundër ligjit ekzistues për restituim dhe shtoi se me miratimin e Planit Hapësinor të Malit të Zi deri në vitin 2020, sipas të cilit Bjeshkët e Nëmuna shpallen Park Nacional, shqiptarëve të Plavës e Gucisë do tu plaçkiten nga ana e shtetit mijëra hektarë tokë të tjera. Me të njëjtat probleme e shqetësime , u tha në tryezë, ballafaqohen edhe qytearët e komunës së Ulqinit dhe të Malësisë të cilëve nuk po u kthehet prona e tyre e konfiskuar nga shteti në kripore, Valdanos, Shtoj, Shas, Tuz e gjetkë.
Nënkryteari i Lëvizjes ” Atdheu na Bashkon”, Naser Çobaj për këtë veçmas fajësoi Qeverinë malazeze, Unionoin Demokratik të Shqiptarëve dhe kryetarin e komunës së Ulqinit, z. Gëzim Hajdinaga ” Sa herë Qeveria e Malit të Zi e ka ndërruar ligjin mbi pronësinë është zvogëluar mundësia e qytetarëve të komunës së Ulqinit dhe të Malësisë për të kthyer pronat e veta.

S`kemi strategji unike të kulturës
Shumë probleme u debatuan edhe në fushën e arsimit dhe kulturës. U konstaua se shqiptarët në Mal të Zi nuk kanë kulturë të mirëfilltë dhe u shtrua nevoja e krijimit të një strategjie unike të kulturës si dhe integrimi në Evropë si parakusht për ruajtjen e identitetit kulturor. Po ashtu është rënë dakord edhe për nevojën e ruajtjes së monumenteve të trashëgimisë kulturore dhe identitetit kombëtar Dr. Nail Draga, duke prezentuar çështjen e arsimit shqip tha se situata në këtë segment është tepër e palakmueshme, duke e ilustruar me faktin se në institucionet përkatëse republikane nuk ka asnjë shqiptar të punësuar, pastaj me planprogramet e imponuara mësimore, tekstet e përkthyera shkollore e të tjera.

Inicohet themelimi i Këshillit Kombëtar
Në këtë tryezë të pranishmit miratuan propozimin e z. Ramiz Sinanaj për themelimin e një grupi ( komisioni) inicues i cili do të shqyrtojë të gjitha rrethanat , mundësitë dhe nevojshmërinë e themelimit të Këshillit Kombëtar. Ky Këshill u cilësua se do të ndihmojë në ruajtjen e identittetit të shqiptarëve në Malin e Zi. Në debatë morën pjesë edhe Vasel Camaj, Xhaudet Cakuli, Ismet Karamanga, Nazif Veliqi , Noc Camaj e tjerë.
Gjekë Gjonaj
KOHA JAVORE

« Previous Page — Next Page »